قالب وبلاگ

ستالینه نئكرولوق یازانلاردان بیری مقاله‌سینه: “فانتاستیك آدامین فانتاستیك كاریئراسی بیتدی؛ 73 ایل اول قوریده فقیر بیر پینه‌چی عائله‌‌سینده دوغولموش اوغلان كرئملده دونیانین ان بؤیوك ایمپئراتورلوغونون ان بؤیوك دیكتاتورو اولاراق اؤلدو” - دئیه باشلاییر.

حقیقتن ده بشریتین یاشادیغی بوتون دونیا تاریخینده ایوسیف ویسساریونوویچ جوقاشویلی - ستالیندن داها موطلق بیر حؤكمدار یوخدور. موهوم درجه‌‌ده اونون شخصی فعالیتیله یارادیلمیش سووئت رئژیمیندن داها توتالیتار بیر رئژیم دونیادا مؤوجود اولمامیشدیر.

دؤوروموزون تاریخینی یازانلار تاریخین بو ان بؤیوك موستبیدی حاقیندا جوربجور حؤكملر وئره‌جك، اونون اللهلاشدیریلان شخصیتینی موختلیف مؤوقئلردن تحلیل ائده‌جكلر. فقط بیز اونو بیر كولل اولاراق اله آلماق نیتینده دئییلیك. ان قورخونج روس چارلارینا نصیب اولمایان بیر اقتدارلا 30 ایله یاخین بیر مدتده سووئت ایمپئراتورلوغونداكی ایكی یوز میلیون اینسانین موقددراتینا حؤكم ائدن، یئر كوره‌سی‌نین اوچده بیرینی كونترولو آلتینا آلمیش، بوتون دینلری اینكار ائدن كوممونیست دینینین بیر پئیغمبری ساییلان، توتالیتارلار توتالیتاری بیر رئژیمین ان بؤیوك نوماینده‌‌سی ستالینی، اونون نئجه بیر دئماقوق، بیر دیپلومات، بیر دیكتاتور و نئجه بیر تئرروریست، بیر ایختیلالچی (اینقیلابچی)، بیر مارشال، بیر گئنئرالیسسیموس، فیرعونلارا، نئرونلارا، چینگیزلره رحمت اوخوتدوران بیر تیران، بیر قیزیل چار اولدوغونو آزاد میللتلر جمعیتینده بیلمه‌ین بیر كیمسه یوخدور. بیلیننلری تكرار ائتمك ایستمیریك. 

1905 و 1917-جی ایللرده روسییا شرطلری داخیلینده اورتایا چیخان سوسیالیست جریانلارینا منسوب ایختیلالچیلار آراسیندا آدی بیر شخصیت اولوب، چوخ دا اهمیت وئریلمه‌ین ستالی‌نین مومییالانمیش جسه‌دی ایندی ماركسدان سونرا كوممونیزمین ایكینجی پئیغمبری لئنی‌نین مومییالانمیش جسه‌دی یانیندا یاتیر. 

صاباحدان اعتباراً دؤردونجو صحیفه‌‌میزده چوخ ماراقلی خاطیره‌لرینی اوخویاجاغینیز مممد امین رسولزاده قافقازدا آذربایجان جومهوریتی‌نین تشككولونده و میللی قورتولوش حركاتیندا تاریخی رولو اولان میللی آذربایجان “موساوات” خالق پارتییاسی‌نین لیدئرلیگینه 1917 و 1919-جو ایللرده باكیدا توپلانان پارتییا قورولتایلاریندا یئكدیللیكله سئچیلمیشدیر. 

28 مای 1918-جی ایلده جومهوریتین ایستیقلالینی اعلان ائدن آذربایجان میللی شوراسی‌نین صدری ایدی. موهاجیرتده آذربایجان میللی حركاتینی ایللردن بری تمسیل ائدن میللی آذربایجان مركزینه صدرلیك ائتمیشدیر. 

موسلمان دونیاسی‌نین تانینمیش بیر موهرریری اولان رسولزاده 1905-1908-جی ایللر آراسیندا باكیدا اینتیشار ائدن توركجه قزئتلرده ایشله‌میش؛ 1915-1917-جی ایللرده یئنه باكیدا مشهور “آچیق سؤز” قزئتینی تسیس و نشر ائتمیشدیر. 1908-1911-جی ایللر آراسیندا تهراندا ایران اوچون ایلك دفعه‌‌ اولاراق آوروپا اصولوندا گونده‌لیك “ایرانی-نوو” قزئتی‌نین مودیر و باش رئداكتورلوغونو ائتمیشدیر (بو خصوصدا باخ: ائ.بروwن. نیسفوری لیتئراری اوف پئرسیا. لوندون). ایستامبولدا چیخان چئشیدلی تورك قزئت و ژورناللاریندا (او جومله‌‌دن “تورك یوردو”) چالیشمیش و 1923-جو ایلدن 1929-جو ایله قدر ایستامبولدا نشر اولونان آذربایجان ژورناللارینی ایداره ائتمیشدیر. 

كئچمیشینی بیلمه‌ین بو گونونو درك ائده بیلمز حقیقتی بایاغی اولدوغو قدر ده آجیدیر. قوچاقلار ایللرله قیلینج و قلم چالدیلار... نتیجه‌ده كئچمیشیندن خبرسیز مانقورد نسیل یئتیشدی. لاكین ائله همین نسلین اؤزونو-اؤزگه‌نی، بؤیویونو-كیچیگینی، خلاصكارینی-خیانتكارینی تانیماق ایستیی، خوشبختلیكدن، سونسوزدور. بو ایسته‌یه جاواب اولاراق الینیزده توتدوغونوز كیتابچانی چاپا حاضرلاماغی لازیم بیلدیك.

بؤیوك وطنداش مممد امین رسولزاده‌نین ستالینله باغلی خاطیره‌لری توركییه‌ده “دونیا” قزئتی‌نین 1954-جو ایل مای-اییون نؤمره‌لرینده 28 مقاله‌ده چاپ ائدیلمیشدیر. “م. امین رسولزاده كیمدیر؟” آدلی بیوقرافیك یازی دا بو مقاله‌لره علاوه‌‌ ائدیلمیشدیر.