قالب وبلاگ

لئنینیزم ماركسیزمین بیر تفسیری اولاراق مئیدانا گلمیشدی؛ ستالینیزم هر ایكیسینی تكمیل ائتمیش بیر سیستمدیر. هیتلئرین ناسیونال-سوسیالیزم فورمولونو چئویریب سوسیال-ناسیونالیزم حالینا قویان ستالینیزمی یاخشیجا قاورایا بیلمك اوچون ستالی‌نین فانتاستیك شخصیتینی حاقییلا آنلاماق لازیمدیر. بونو یاپا بیلمك اوچون تاریخچیلرین ستالین حاقیندا یازیلان خاطیره‌لری، نقل اولونان تسسوراتلاری و آنلادیلان موشاهیده‌لری ماتئریال اولاراق گؤزدن كئچیرمه‌لری لازیم گله‌جكدیر. 

ستالینیزمین مئیدانا گلمه‌سی‌نین كاراكتئریك جیزگیلرینی اصلینه یاخین بیر شكیلده تصویر ائده بیلمك اوچون هر كسین اؤزونه گؤره گؤردویو و آنلادیغی “ستالین”لرین قارشیلاشدیریلماسیندا، شوبهه‌سیز، بؤیوك بیر فایدا واردیر. 

عینی دؤورده، عینی شرطلر داخیلینده، عینی نسله منسوب اولاراق یاشایان، دورلو زامانلاردا، دورلو شرطلر آلتیندا ستالینله بو و یا باشقا شكیلده تماسا گلمیش بولونان بیر آدام صیفتیله خاطیره‌لریمین اونا عاید اولان قیسمینی نشره قرار وئردیم. چارلیق رئژیمینه قارشی موجادیله سووئت ایستیلاسی و اسارتی، موسكوا یولوندا، موسكوادا ایكی ایل و موسكوادان قاچیش فصیللرینی ائهتیوا ائدن بو خاطیره‌لر چاغداش تاریخچیلرین ایشینه یارایارسا، صرف ائدیلن امك بوشا گئتمه‌میش اولار قناعتینده‌یم. 

بو خاطیره‌لری ستالین حیاتدا ایكن ائدیلن بعضی تكلیفلره رغمن نشر ائتمك ایسته‌مه‌میشدیم؛ چونكی اوبیئكتیو اولاراق نقل اولوناجاق حادثه‌‌لرین بیر قیسمی، بیر باخیمدان، غرضلی ایضاها یئر قویا بیلردی. ایندی ایسه بو احتیمال مئیداندان قالخمیش، ستالین آرتیق تاریخه قاریشمیشدیر. 

بؤلوم لر: محمدامین رسول زاده،