قالب وبلاگ

دیوانخانا هیتی‌نین دیوارلاری بوْیو سۆتونلار اۆزرینده قۇرولموش چاتماتاغلی آركالارین یاراتدیغی اۇزون، دۆزبوجاقلی ائیوان مركزی بینانی، پاویلیوْنو اۆچ طرفدن احاطه‌‌ ائدیر. هیتین گۆن‌باتانا باخان خاریجی گیریش یوْلو كۆچه طرفدن درین باشتاغلا قئید ائدیلمیشدیر.عابده‌نین ایكینجی باشتاغی پاویلیوْنون چاتماتاغلی ائیوانینا قرب طرفدن بیتیشه‌رك،داریسقال یئرده، پاویلیوْنا عظمتلیلیك، وۆقارو اۇجالیق تأثیری باغیشلاییر. بۇ پوْرتالین چاتماتاغلی تاخچاسی ظریف، دیلیم- دیلیم فوْرمالی یاریم‌گۆنبزله نهایتله‌نیر.بۇ یاریم‌گۆنبز زنگین ستالاكتیتلرقۇرولوشونا سؤیكنمیشدیر. باشتاغین تیمپانلاری گیریش یوْلونون اۆستونده‌كی سته اۆزرینده اوْیما ناخیشلارلا، قاباریق نباتی اوْرنامئنتلرله بزه‌دیلمیشدیر. گۆمان ائدیلیر كی، گیریش یوْلونون اۆستونده عابده‌نین تاریخینه دایر یازیلار اوْلموش، لاكین نه واختسا سیلینیب آتیلمیشدیر.

بۇ عابده‌نین نه وظیفه‌‌ داشیدیغی مۆباهیسه‌لیدیر.گۆمان ائدیلیر كی،بۇ بینادا شیروانشاهلار دؤولت شۇراسی‌نین ایجلاسلارینی كئچیریرمیش. بۇ واخت سالوْندا شاه و سارای عیانلاری، هیتده‌كی ائیواندا ایسه وارلی شهر ساكینلری، دعوت ائدیلمیش وطنداشلار و س. ایلشیرمیش.

دیوانخانانین اوْن بئش عصرین نادیر بیر عابده‌سی كیمی، آذربایجان مئمارلیغیندا خۆصوصی یئری واردیر. بۇ بینانین بیر سێرا بدیی مئمارلیق كئیفیتلری اوْنو اینجه‌سنت ارثیمیزین گؤركملی عابده‌لری سێراسینا داخیل ائتمیشدیر. اوْنلاردان كوْمپوْزیسییا تاملیغینی، مئمارلیق  فوْرمالاری‌نین كامیللیگینی، دئكوْراتیو اۆنسورلرین یارادیلماسینداكی  ائجازكار اۇستالیغی، مئمارلیق كۆتله‌لری آراسینداكی مۆوازینتین دۆزگونلوكله تاپیلماسی و اوْنلارین داخیلی بوْشلوقلا عضوی صۇرتده اۇیغونلاشدیریلماسینی، عۆمومی تیكینتیده آیری- آیری مئمارلیق اۆنسورلری‌نین دۆزگون میقیاسدا   یئرلشدیریلمه‌سینی و س.  گؤسترمك لازیمدیر.

بۇ بینانین پوْرتال بزییله شیروانشاهلار تۆربه‌سینده‌كی باشتاغین دئكوْراتیو كوْمپوْزیسییاسی، آیری- آیری دئكوْراتیو اۆنسورلر دیوانخانا سالوْنوندا آلتیگوشه‌لی مئدالیوْنلاردا و تۆربه‌ده‌كی پوْرتال مئدالیوْنلاریندا گۆزگو عكسلیگیله یازیلمیش قاباریق "الی" سؤزلری و س. آراسینداكی یاخین یارادیجیلیق اۆسلوبو یئرلی شیروان مئمارلیق مكتبی‌نین صنعت خزینه‌سیندن خبر وئریر.


بؤلوم لر: آذربایجان تاریخیندن یۆز شخصیییت ،