قالب وبلاگ

1324-نجو ایلده رضا شاهین دیكتاتورلوغو قوغوق بیتدی. آذربایجان غزئتی گئنه ده نشر اولماغا باشلار . بو غزئتله تانیشیقلیق، دقتور زهتابینی آیریلماز شكلیده آنا دیلینه باغلار. بو دؤوردن آنا دیلینی علمی جهتدن اؤیرنمك اوچون دانشگاها گیریب او زامان موجود اولان بوتون قاپیلاری دؤیوپ، چابالادیسا دا هامیسی اوزومه باغلانیر.

بو هدفه چاتماق اوچون باكی دئیه قاچاق شوروییه گئدر. لاكن اورادا دا "صادق پادگانلارین" گؤستریشیله دانشگاه یئرینه محاكمه اولوناراق سیبیرده ایشلمگه گؤندریلر. ایكی ایل سونرا سیبیردن تاجیكستانین پایتختی دوشنبه شهرینه گؤندریلیر.

زهتابی بو دؤنمی بؤیله آنلادیر:
بیر ایل بورادا آخشام مكتبینده اوخویوب دیپلم آلجاق اونو بیر عریضه ایله با كی دانشگاهیندا گوندردیم .ایكی هفته سونرا اورادان مثبت جواب آلیپ، كیتابلاریمی ییغیشدیریب باكیدا اوخوماغا گئتدیم ویاتاقخانادا یئرلشدیم.
گونلرین بیرینده یاتاقخانا مسئولو یانیما گلیب آدیمی سوروشدوقدان سونرا:
-سنی دانشگاهین رئیسی(بویوك شیمیست مخترع اكادمیك نخجوانلی یوسف محمد علی یف) چاغیری دئدی، گئت گور نه دئییر.
یوسف محمد علی یف آدیمی وهارالی اولدوغومو سروشدوقدان سونرا:
-هانسی ریشته ده اوخوماق ایسته ییرسن؟ دئیه سوروشدو.
-آذربایجان دیل وادبیاتی بولومونده، دئیه جواب وئردیكده، رئیس قاباغیندا اولان دیپلوموما اشاره ائدره ك :
-بئله یاخشی قیمتلرله نییه اورادا اوخویورسان –گل شیمی بولومونده اوخو– دئدی.
-حرمتلی آكادئمیك منیم خلقیم احتیاجی هله بونادیر –دئیه جواب وئردیم.
-بو سوزلریمی ائشیدن دانشگاه رئیسی آكادئمیك ایلان ووموش كیمی دیك یئریندن قالخیب گلدی و منیله صمیمی ومحكم ال وئرَرَ ك، سنه موفقیتلر آرزولاییرام –دئیه رك منی یولا سالدی.

بئش ایل باكی دانشگاهیندااوخودوقدان سونرا، همین دانشگاهین شرقشناسلیق دانشكده سینده عرب دیلی وادبیاتینی تدریس ائتمگه و ائله بو گونلردن آنا دیلی باره ده الده ائتدیگی بیلگیی خلقینه چاتدیرماق حقینده فیكیرلشمگه باشلار. چون كی خلقیمین اونا احتیاجی واریدی.

زهتابی بو هدفه یئتیشمك اوچون،عبدالكریم قاسم عراقدا ایشی اله آلان گوندن عراقا گئدیب پناهنده اولماق اوچون اقدام ائدر و اون ایكی ایل باكی–موسكو آراسیندا بو ایش اوچون گل-گئت ائدر و نهایت 1971-ده /1350 ش/ بغدادا گئدیب اورانین دانشگاهیندا فارس دیلی و قدیم تورك دیللرینی تدریس ائتمگه باشلار.

1979-دا انقلابین غلبه سیندن بیر هفته سونرا وطنه دونوب خدمت ائتمك اوچون موقتی حكومته مراجعه ائدن زهتابی، مثبت جواب آلدیقدان بئش آی سونرا وطنه قایدیپ ونئچه آی سونرا تبریز دانشگاهیندا ترك و عرب دیللرینی تدریس ائتمگه باشلار، اوتوز ایلدن سونرا خلقینین ایچینده اولماق تبریز دانشگاهیندا تدریس زامانی یوزلرجه گنج ترك قیزلاری واوغلانلاریله یاخیندان تانیشلیق نتیجه سینده خلقیمیزین آنا دیلی نه سوییه ده و درجه ده قوراماغا حاضیر اولدوغونو اؤیرندیكدن سونرا گؤرور كی خارجه ده چاپ ائتدیردیگی ایران توركجه سینین صرفی كتابینین دیلی و سطحی یوكسكدیر.

بو زماندا دانشگاهلار باغلار. لاكن زهتابی تبریز دانشگاهیندا ایشله ییب لكسیكولوژی زبان ادبی معاصر آذری اثرینی یازدیغیی زامان آنا دیلیمیزی اؤیرنك آدلی دیلیمیزین سس بؤلومو و صرفینی احاطه ائدن اولدوقجا ساده بیر كتاب یازار.

1368-ین اوللرینده تبریز رادیوسو ایداره سینین تركی / برون مرزی/ شعبه سیندن اونا مراجعه ائدرك معاصر ادبی آذری دیلینی او شعبه نین ایشچیلرینه تدریس ائدیب اؤیرتمگی تكلیف ائتدیلر. خلقینین دیلینه خدمت اوچون حكومتین یاراتدیغی بو كیچیك امكاندان تمناسیز و بؤیوك ممنونیتله استقبال ائدر. بو تدریس جریانیندا معاصیرادبی آذری دیلی (سس-صرف) كتابی مئیدانا چیخدی.

دقتور زهتابی سونونا قدر معاریفچیلیك ایشینی سوردوردو. بو یولدا مهتشم و اینانیلماز درجه ده ائتگین اولان آلترناتیو اؤیرتیم و آلترناتیو اونیورسته سی دییَبیلجیمیز مئتودلا درس كیلاس لاریندا ترك دیلینی، تاریخینی ،كولتورونو اؤیرنمه سی، یئنیدن اورتمه سی(باز تولید) یاساقلانمیش هر شئی ساختالاشدیریلمیش، بوتون معنوی وارلیغی ایرگن مه لی اعلان ائدیلمیش بیر میللتین، شووئنیزم ایله كیرلنمیش، موردارلانمیش رسمی ائیتیم سیستیمینه قارشی آذربایجان اوچون بیر اویانیش و بیر مدنی و بیلنجلندیرمه ایشینه رهبرلیك ائتدی. ذهتابی، 02.10.1377-ده چالیشما و باشاریلارلا دولو یاشام دونیاسینی دگیشدیردی.

بو گونه قدر چاپ اولونان اثرلری:
1. ایران توركلرینین اسكی تاریخی 2 جیلدده،
2. شاهین زنجیرده - شعر تبریز،
3. معاصر ادبی آذری دیلی،
4. علم معانی-لكسیكولوژی تبریز،
5. آزربایجان توركجه سینین نحوی،
6. علی آغا واحیددن خاطیره لریم،
7. پروانه نین سرگذشتی - شعر بغداد،
8. باغبان ائل اوغلو - شعر تبریز،
9. چیریك افسانه سی بغداد،
10. بذ قالاسی-برلین،
11. بخت خوابیده بغداد،
12. هستی نسیم بغداد،
13. زبان آذری ادبی معاصر -آواشناسی- قواعد شناسی- تبریز،
14. قوی اولسون اون-حیكایه تبریز،
15. قواعدالفارسیه –عربجه،
16. جنایات 2500 ساله شاهان –بغداد،
17. آیا زبان فارسی به زبان ملل دیگر برتریت دارد؟ - بغداد،
18. ارك هفته لیگی –برلین،
19. ماهنامه اتحاد یولو –بغداد،

چاپ اولونمایانلار:
1. گنچلیك چلنگ،
2. میرزا علی معجز شبسترلینین شعرلری 5 جیلدده توپلانمیش.

بؤلوم لر: آذربایجان تاریخیندن یۆز شخصیییت ،