قالب وبلاگ

اوستاد آتش تقی پور گونش ایلی 1324 ینجی ایل خوی شهرینین هنده ورنده آنادان اولموشدور . البته بیلیریك كی خویون سینما – تئاتر تاریخیمیزده دانیلماز رولو اولموشدور .نییه كی اورادان بهروز وثوقی كیمی دونیا شهرتلی هنرمند باش قالدیرمیشدیر . ائله آتش ده همین شهردن قووزانمیشدیر . او هنر سئورلیك پایین اوز آتاسیندان كسب ائتمیشدیر . نییه كی آتاسی اوز زامانیندا خویدا تانینمیش هنرمندلردن ایدی كی ؛ بول – بول تیاتر اجرالاری اولموشدور .

كیچیك یاشلاریندان اعتبارا هنر عالمینه آیاق قویان آتش تقی پور 12-13 یاشیندا اوز چالیشمالارین تیاتر عالمینده باشلامیشدیر . او ؛ هنرینین اجراسی ایله درسین ده اوخویوب نهایت چوخ سئودیی رشته یعنی ائله سینما تیاتردا لیسانس آلابیلمیشدیر . او ؛ پایان نامه سینده آذربایجانین تانینمیش معارف خادمی میرزه فتحعلی آخوند زاده نین اثرلرینه دایاناراق دفاع ائدیب و عالی نومره لر له ماذونیت سندی الده ائتمیشدیر .

بو گوركملی هنرمندین آدیندان سوروشاندا ماجرالی بیر قضیه نی نقل ائدیر . : دموكرات لیق چاغی بیزیم خویدا گویا بویوك بیر شخصیت وارایدی كی آدی آتش خان ایدی . اونون قهرمانلیغی ؛ جومردلیی ده ائل ایچره دیلده – دیشده گزردی . آتام بئلنچی بیر شخصیته گووه نه رك بیر گون ائوده دئمیشدیر : بو اوشاغین آدین آتش سسله یه جك سیز . بوندان باشقا بو اوشاغا بیر آد سسله ینله ره لعنت اولسون . و بئله لیك ده منیم آدیم  آتش اولور . " ماراقلی دیر كی بورادا هم آتش سوزو توركجه دیر همده بیر میللی قهرمانین آدیندان آلینما دیر كی تاسف له او قهرماندان بو گون آغیز یاندیران بیر خاطره الده یوخدور .

آتش تقی پور نئچه جهت لی بیر هنرمند دیر . او ؛ سینما – تیاتر عالیمدن باشقا یازیچی لیق عالمینده ده اوزوندن بیر سیرا اثرلر چاپ ائتدیره بیلمیشدیر  كی بونلاری گوسترمك اولار :

1-     بایاتیلار

2-     یالقیز – یالقیز

3-     قورخویا سالمایین منی

4-     طنز سیاه پوش ( فارسجا )

آنجاق دئمه لی یم كی بیر چوخلاری كیمی اوستاد آتش تقی پورون دا چاپ اولمایان اثرلری ؛ چاپ اولانلاریندان قات – قات یوخاریدا دورور . بونلار لا برابر  آتش خانین رول كئچیردیی سریاللاردان بونلاری گوسترمك اولار :

روزی روزگاری ؛ تفنگ سر پر ؛ شب دهم ؛ خانه ای در تاریكی و ... هابئله اونون اونلارین سینما فیلم لریندن ایسه بونلاری آد چكمك اولار : مسافران ؛ مخترع 2001 ؛ طلسم ؛ عروسك ؛ زیر درخت هلو  و ...

بو چالیشقان هنرمند سینما عالمینده بیر سیرا اویون بازلیقلاردان گیلئیلی ایدی .او دئییر كی ؛ قولاغیمیزا دییر بیریسی كارگردانا پول وئریب فیلم اویناییر . البته شوكورلر كی بو ایش بیزیم چوخ سئودییمیز تیاتر عرصه سینده هئچ اولاسی اولا بیلمز . تاسف له دونه – دونه اولوب كی بیز بیر تیكه چوره یه گوره اوره یمیز سئومه دیی ایشلرده ده اشتراك ائتمیشیك . آذربایجانین فخرلریندن بیریسی اولان آتش تقی پور بوگون حایات یولداشی ایله یاشام سورمك ده دیرلر . بیز آرزی ائدیریك كی بو هنرمندین كئفی همه شه ساز ؛ داماغی ایسه اولدوغو كیمی چاغ اولوب ؛ گونو – گوندن بو  اوجسوز – بوجاقسیز وادی ده پارلاسین لار .

بؤلوم لر: آذربایجان تاریخیندن یۆز شخصیییت ،