قالب وبلاگ

_{محمد تقی خان 25 یاشیندا ایكن ائییتیم اوچون آلمانیایا گئدیب پیلوتلوق ( خلبانلیق) ائییتیمی آلیب، 33 دؤنه اوچور. دئمك او اؤلكه نین بیرینجی پیلوتودور. محمد تقی خان آلمانیادان دؤندوكدن سونرا خوراسان قاراقولونون( كلانتری- ژاندارمری) باشچیسی اولور. او، 1339- جو(1300- جو گونش ایلی) ایلین كودتاسیندان سونرا و سید ضیاالدین طباطبایی ایش اوسته اولدوغو چاغدا خوراسان والیسی قوام السلطنه نی توتوقلاییب تهرانا گؤندریر. سونرالار كلنل پسیان خوراسان والیسی اولور. قوام 1340-جی ایل، سید ضیاءالدین قاچاندان سونرا اؤلكه نین باش باخانی اولور. او، خوراسان والی لییینی نجد السلطنه یه وئریر. كلنل باش قالدیریب نجد السلطنه نی توتوقلاییب اؤزو ایش باشینا كئچیر. همین ایلده دؤولت، بختیارلی صمصام السلطنه نی خوراسان والیسی تعیین ائدیر. او ایسه كلنله بیر سیرا وعده لر وئریر. قوام دا كلنلین آوروپایا گئتمه سینی اونا اؤنه ریر آنجاق كلنل بو آؤنرینی رد ائدیر.
     قوام عوصیانی یاتیرتماق آماجی ایله بجنورد والیسی سردار معزز، ایران - آفغانیستان سینیرلاریندا اولان هزاره ائلینین باشچیسی شجاع المولك، سریری طایفاسینین باشچیلاری شوكت السلطنه و سید حیدر هابئله  بلوچ سالار خاندان كلنلین توتوقلانماسینی ایسته ییر. كلنل شجاع المولكون قوشونونا قالیب گلیر. امیر شوكت باریش یولو ایله سورونو چؤزمه یه چالیشیر. ائله بونا گؤره ده كلنل له گوناباد دا گؤروشمك ایسته ییر. عینی چاغدا سردار معزز قوچان كوردلری ایله قوچانا یوروش ائدیب قاراقولو سیلاحسیزلاشدیریب قوچانی توتورلار. كلنل بو خبری ایشیدیب- ائشیتمز قوچانا دؤنور. قوچان یاخینلیغیندا اولان جعفر آبادین داوودلو تپه لرینده چوخ ساییلی یاغیلار كلنلین 75-دن آز اولان آداملارینا اوستون گلیرلر. بو آغیر دؤیوشده كلنل یارالانیر آنجاق سون قورشونا دك دایانیب 7 قورشون گؤوده سینی دلیك- دئشیك ائتدیكدن سونرا شهید اولور. یاغیلار اونون باشینی كسیب اؤلوسونه چوخلو سایغیسیزلیقلار ائدیرلر. بئله لیكله كلنلین 7 آیلیق قالخینماسی یاتیردیلیر.
     كلنلین كسیلمیش باشی ایله گؤوده سی مشهده گتیریلیب اولو باباسی نادیر شاه ین یانیندا تورپاغا وئریلیر. آنجاق هله ده قوام سویومامیشدی. او، كلنلین اؤلوسونو قویلاقدان چیخاریب قبریستاندا قویلانماسینی بویوروق ائدیر. بؤیوك ایگیدین دوغما یوردوندان اوزاق نیسگیللی اؤلوموندن سونرا اونا چوخلو شعرلر و آغیتلار سؤیله نیلیر. اونون اؤلوموندن 5 ایل سونرایا دك هر ایل یاس تؤرنلری كئچیریلیرمیش آنجاق پهلوی حاكمیتی ایش اوستونه كئچندن سونرا بو تؤرنلری یاساق ائدیر.
    كلنل محمد تقی خان پسیان  توركجه میزدن ساوایی، عربجه، فارسجا، آلمانجا، فرانسیزجا، اینگیلیزجه و روسجانی دا یاخشیجاسینا باجاریرمیش. او، چالغی، یازیچیلیق و شعر ساحه سینده ده چالیشیرمیش. اونون شعرلریندن بیریسینین چئویریسی ایله بو یازیا سون قویورام.}

_{وطن شرفینی جانلا قورویاق
وطن دن دوشمنی بوسبوتون قوواق
بسدیر بو بطالت، بسدیر سرخوشلوق
قالخین،داها بسدیر، بسدیر لاقئیدلیك
بیزه یاراشماییر اسیر یاشاماق}

_{آلچاق یاشاماقدان اؤلوم یاخشیدیر
بو اؤلوم اینسانا شرف بخش ائدیر
اگر توفنگ یوخدور،قیلینج یوخدورسا
دوشمنی یوموروقلا، آغاجلا قوواق
بیزه یاراشماییر اسیر یاشاماق}

_{وطن تورپاغیندا مرد آددیملایاق
هر بیر مانعه نی سیندیریب آتاق
 یوروش بابالارین تاریخینده دیر
ای ایگید اوغوللار، گلین، ووروشاق
بیزه یاراشماییر اسیر یاشاماق}

یازیچی :محمدرضا خیری فام

     _{قایناقلار:
1- ترورهای سیاسی در تاریخ معاصر ایران جلد اول، دكتر علی بیگدلی1377
2- مشاهیر آذربایجان جلد دوم، صمد سرداری نیا، 1379
3- قیام كلنل پسیان در خراسان، علی آذری، 1329
4- تبریز شهر اولین ها، صمد سرداری نیا، 1385
5- تاریخ ژاندارمری، پرویز افسر،1332     
6- چئشیدلی درگیلر}