قالب وبلاگ

داراشلیق بیر قارانلیق یئره دوشموشدوم. ال - ایاق چالیردیم چیخابیلمیردیم. سسیم چوخ اوجالیدی آمما اؤزوم ائشیدیردیم، كیمسه منی گؤرموردی، سسیمی ائشتمیردی.چوخ بیر دهشتلی شرایط ده قالمیشدیم من هامی نی گؤرودوم، منه باخیردیلار آمما منه یاردیم ائلی ین یوخودور. بیر بله آدام ایچینده نئجور او ییرتیجی حئیوانلار منه دیشلرین برلدیردیلر بیلمیرم.

اوزون زامان منیدیم بیر ده قارانلیق یئر، ییرتیجی حئیوانلار آداما بئنزیردی. یاواش یاواش زوروم گئدیردی، سسیمده یونگیللشیردی. دورت دورمی او ییرتیجی حئیوانلار آلمیشدی. موحاصیرده قالمیشدیم، آمما بو حئیوانلار منه یوروش گئتیرمیردیلر. منی قورخودوردولار. اوشاقلیق زامانی بو ایشلردن بؤیوك قارداشیم گؤرردی، باشینا بیر قویون دریسی اؤرتوب منی قورخوداردی.

آمما او قورخو اورگیمی چیرپیلداتمازدی. اورگیم قورخودان آغزیما گلمیشدی، اؤلوم نن قورخموردوم، یالقیزلیق منی قورخودور، آداملار ایچینده ییرتیجی حئیوان اولماق منی قورخودوردی، علاجسیز قالمیشدیم، نئجه دفعه چؤلده گؤرموشدوم بالاجا قوزونی بو ییرتجی حئیوانلار یینده، فیكیرلشیردیم منی ده او جور ییئجكلر.

اؤزون زامان موحاصیره ده قالاندان سونرا بیر اؤلی تری هیكلیم بورودو، اؤلو قوخوسو وئریردیم، دای ایشیم كومك ایسته مكده كئچمیشدی، اؤزومو آماده ائلمیشدیم بیر یكه محاربه یه.

-          گلون كؤروم سیز نجیسیز؟ بونو قورخا- قورخا من دئدیم.

-          ییرتیجی حئیوانلار منه باخدیلار، آداملار كیمی گولدیلر.

دورت دوره دن منه یاخینلاشیب، منی توتدولار،آمما باغازیمی چیرمادیلار، بدنیم تیكه تیكه ائله مه دیلر، منی اؤلدورمه دیلر، آغزیمی زورلا آچیب دیلیمی قوپاردیلار.

 

                                                         1393-7-16

 

www.facebook.com/mahmooddalgha

www.qizildag.arzublog.com

بؤلوم لر: اۆز یازیلاریم ،