قالب وبلاگ

سینیق قاپی نین یانینان ایچری باخدیم،ساكیت و كمسه سیز بیر یئری ایدی.

-          دوز گلمیشم؟

-          آتام دئین یئر بورادی؟

گیردیم ایچه ری، سئرچه لر منی گؤرجك تعجوبله‌نیب اوچدولار، كنارداكی سؤویت آغاجینین اوستونه قونوب قونشماقا باشلادیلار:

-          اؤلوسی وار گلیب قبیر قازا.

-          یوخ یولون آزیبدی.

-          نه معلوم شاید گلیب بیزه تئله قورا.

-          ....

یارپاقلاری ایاقلییا ایاقلییا گزمگه باشلادیم، گؤزوم هردن بیر داشلارین اوستونده یازیلمیش آدلارا توخونوب اونلار منیم دقتیمی اؤزلرینه چكیردی.

-          محمد.. تاریخ فوت ...

-          كوبرا ...  تاریخ فوت ...

-          ...

چوخ اوزاق زامانلار كی آتام ائله گلردیم، بو آدالارین چوخون گؤرمه میشدیم،گؤره سن یئنی اؤلودولر،تاریخ اؤلوملرینه باخدیم، یوخ چوخدانكیدیلار آمما من اونلاری گؤرمه میشدیم.آز بیر یئرده دوردم،اؤزوم ائله فیكیرلشمگه باشلادیم:

-          آتام ایله گلنده هانسی طرفه گئدردیك؟

-          گیمی گؤرردیگ؟

بیلیرسن اوغول بو اینسان چوخ گنج واختیندا اؤلونوب، اونی دارا چكدیلر، اؤزوم گؤردوم، بیزیم بو ساعات قاباقیندایدی داری قوردولار. ائله بیله سن همین آلاندی.بونلار آتام دیین سؤزلری ایدی، بیر بیر یادیما دوشوب منی او دئین جاوانین قبیرینه طرفینه چكیردی.

بیلیرسن اوغول آدام گرك یولداشلارین آغیر گونلرده تانیسین. هامیمیز ال بیر اولموشدوق، آزادلیقا ایتیشمیشدیك، ایستقلال واریمیزایدی. دوشمان بیزیم شنلیك و آزادلیقمیزی گؤرنمه دی، هوجوم گتیردی، بیزه غلبه گلدی، چوخ ال بیر اولانلار اؤز باشیلارین گؤتور چاقدیلار، بیزده دوردوق دار آغاجینین آلتیندا دارباشنداكی لارا باخدیق...

سئرچه لر اوچدی. فیكیرلرده منیم بئینمنن اوچوردو، ایاقلاریم قووت تاپمیشدی بورایا چكیلیب گلمگین سببین بیلمیشدیم،منیم چوخ اوشالیغیمندان وطن شهیدلری نین آدی گلنده اورگیم چیرپیناردی،اونلارین برابرینده باش ایمه گی اؤزومه بیر فخر بیلردیم.

یئتیشدیم فبیرین باشینا،فبیرداشنین رنگی سولموشدو، چورویوب دئشیك دئشیك اولموشدو، چوخ جتنیلیك ائله داشین اوسته گنج شهیدین آدین اوخودوم:

"فریدون ابراهیمی"

بیلیرسن اوغول، بو جاوان بیزیم موستقیل دولتیمیز اوستانداری ایدی. اونلارین بیزیم بویونموزدا چوخ حققلری وار، اونلار اؤز جان لارین قوربان ائله دیلر كی بیز اؤز آنا دیلیمیزده دانیشیب، یازماق بیلك، ایستقلال هززین داداق، اؤزگه بایراقین آلتیندا یاشامییاق، اونلار بیزه دئدیلر كی بو جور اؤلمك زیلتلی یاشاماقدان اؤنملی دیر.

قبیرین توزون سیلدیم.ایسته دیم آغلییام،اورگیم چوخ دولموشدو، من بورایا هئچ واخت تكجه گلمه میشدیم،آدامسیزلیق یامان دردیمیش، بودرد ائله درد دی كی بیزیم شهیدین قبیرداشیندا پارتدادیب.

الیم یوموروق ائلیب باسدیم آغزیما،آغلاماغی ایچمده بوغدوم، آغلاماق دوشمانی شنلیكدیرر.

بیلیرسن اوغلول بیزیم دردیمیزده و علاجمیزدا اؤز الیمیزده دی،آتامیم سسی قولاغیما یئنی دن دیدی اؤزرریك دنه سی اود اوستن آتیلان كیمین یئردن قالخدیم.

بؤلوم لر: اۆز یازیلاریم ،