قالب وبلاگ

 مشت‌قادرعمی‌نین حیاط‌یولداشی بونو دئیب گوله‌گوله پالاتادان چیخدی ایشیگه.او بیر‌اوجا بویلی قارا قاش گؤزلی قادین ایدی، همیشه گولش دوداقیندایدی ‌آمما گؤزلرینین ایچینده بیر گیزلین قم وارایدی. او بیلیردی كی مشت‌قادرعمی هرنه دئسه او ایشی گؤره‌جكدی و هیچ كیمسه اونی توتدوقی قراردان قایتارابیلمز.

 

پائیزین خوش گونلرینن بیری ایدی مشت‌قادرعمی آروادی ائله اوتورموشدولار ائششكین اوسته و آغ بولاقا قوناق گئدیردیلر. مشت قادرعمی هردن بیر یانپرتی اوتورب و اؤز قادینی ائله چوخ سئوملی دانیشیردی.دئیردیلر، گولوردیلر، چوخ شادیدیلار. مشت‌قادرعمی بیر ایكی آیی ایدی كی بیربوز اركك ائششك آلمیشدی.

-          گؤردون ائششك نیه یاخچیدیر،نئچه ایلدیر بیز آغ بولاغا گلن مه میشیك؟ هامی بیزدن گیلایه ائلیرلر.

-          هن من نه بیلیدیم. دئیردیم یانی بیزیم كی مال داواریمیز یوخدور،یئر یووامیز یوخدور ائششك نه ایچوندی.

-          ایندی نه دئیرسن؟

-          یاخچیدی.

مشت‌قادرعمی نین بیرجانی دی بیر ائششگی،اونی هرگون تمیزلیب، یئیب ایچمه سینه چوخ دقت ائله ردی،سویوغ گونلری اونا ایلیق سو وئرردی كی آغزی اوشومه سین. سووقلاماسین.

 

پائیز سونا چاتیب،قیشین اؤنجه گونلرینده آغیر بیر قاردوشموشدی، كندین یول لاری باغلانیب گئت گل كسلمیشدی.بیزیم دار كوچه آغزیناجاق قارلا دولموشدو. كند ائله سوكوتا گئتمیشدی كی ائله بیله سن بو كنده هئچ كیم یوخدو. قبیرساندیقا بنزیردی.

قار هله قوتارمامیشدی، آغام حیطی سوپوره سوپوره دئیردی:

-           گؤو چیریلیب، یوخسا بوجور كی قاریاغما اولماز، قار لاپا لاپا هر یانی آلیب آلتینا.آلاهین وئردیكلرینه شوكور، بو نه هدییه دی كی قاباغین آلمیر، بیزی زندگانلیقدا چیخارتدی. بوجور یاغسا دام دووار توكولر باشیمیزا. اوشاقلاردا كی هئچ زادی دوشونمیرلر یوللارین سوپورمه میش بویانا اویانا آتیلیرلار قار بركییر،بوزا دونور نا واخت كله لری اوسته یئره دیَه‌جكلر بیلمیرم.

بو حالدا قاپینی چادیلار، پوروزه خالا رنگی سولموش بیزیم حیطه گیردی، دیلی توتا توتماز دئدی:

-          اؤلور،...

دای دینمه‌دی، بیلمه دیك سویوغداندی یا قورخودان، آغام پئنجه كین بئلینه آتیب پوروزه خالا گیله قاچدی. بیزده اونون دالیجا. آنام او سویوقدا قارین ایچنده آیاقلارین گئتمیشدی.پوروزه خالا بیزیم قارشی قونشوموزایدی، اری نئچه ایل بوندا قاباق قوربت یئرده فهله لیگه گئتمیشدی و اوردا اولمیشدی هئچ كیم ده بیلمه دی نه ایچون.ایندی ده قیزی آغریدان اؤلوم حالیندایدی،نه ایچون بیلمه دیك.

های كوی كنده باسدی،چوخالاری گلدی، هره بیر درمان دئیردی.آمما هئچ بیرینین سببی اولموردی.

مشت قادرعمی جاماتی یانا ووروب گیردی، اوشاقی بو حالادا گؤرجك دئدی:

-          نئیه دوروب سوز، اوشاق اؤلور، بونو تزلیكجه گرك دوختورا آپاراق.

هامی مشت قادرعمی یه باخدیلار،هئچ كیم دیینمه دی آمما باخیشلار بونو یئتیردی‌كی‌بوحالادا،نجورآپاراق،سنوندا‌كی‌اوشاقون یوخدی نه بیلیرسن،اوشاق دردی نمه نه دی؟

بئش آلتی آدام بو سؤزو ائشیتجه كی مشت‌قادرعمی دئیر اوشاقین دوختورا ائحتیاج واردی ائودن چیخدیلار، اونلارین زورلی آتلاری وارایدی، ایسته مه دیلر كومك ائله سینلر.

مشت قادرعمی آغاما اوزون توتوب دئدی:

-          پئنجككوی گی،اوشاقیدا حاضیرلاین، من ائششك گتیرم،گئته ریك.

اوشاقی بیر قالین پتییه بوكوب ائششگین اوسته سالدیلار، آغام و مشت قادر عمی ده اونون یانیندا یولا دوشدولر.

قارچوخ قالین یاغمیشدی بئچارا ائششك باتا باتا اؤزون قاردا ائشیگه چكیردی.مشت قادرعمی الین بوزائششگین باشینا چكیب دئدی:

-          بیلیرم چوخ بیر پیس گوندی،آمماگورورسن اوشاق اؤلوم حالدادی،آللاهین كومكی ائله سن بیزی دوختورا یئتیررسن.ائششگین بوینونا بیر محبتلی ضربه ووردی.

بوز ائششك چوخ زورلی و قووی یولا دوشدی، او محبتی حیس ائله دی.بیلدی كی بیر اینسانی نئجات وئرمك ایچون لازم دیر اؤزون زحمته سالسین،گؤزلری چوخ گؤزلیدی،آدام باخماقدان دویمازدی، كنده مال حئیواننان صوحبت آچاندا مشت قادرعمی نین ائششگی باشدایدی.چوخلاری دئیردی بو ائششك دیَئر جئیراندیر.

بیزیم موسافیرلر چوخ كندن اوزاقلاشمامیشدیلار كی كولك باشلادی،پوروزه خالا چادیراسین بئلینه باغلیب ایسته دی موسافیرین دالینجا گئتسین كی آنام و آیری قادین قونشولار قاباغین آلدیلار.

-          آرواد دلی اولموسان،ایندی سن هارگئدیرسن.

-          قویون گئدیم سیز آللاه اورگیم پارتییر. منیم بیر اوشاقیم وار اونودا الدن وئرسم اؤزومده اؤلمه لیم.

-          یوخ سن كی گئده بیلمه سن بو سؤزلری ده اونود، كئچ اوتور دوعا ائله آللاه كریم آللاهدی.

-          باجی قادان آلیم كئج اوتو گئتملی اولسیدون، گئتملی واخت اولسایدی كیشلر سنی ده اؤزلری ائله آپارادیلار.

-          ...

كولك ائله زورلی اسیردی كی گؤز گؤزی گؤرمیردی. آمما بوز ائششك كولكین ایچینده قیلنج كیمین یولوكسیردی قاباغا گئدیردی.

-          مشت‌قادرعمی،سن اوطرفدن منده بوطرفدن اوشاقدان یلیك اولاق،ائحطیاطلی اولماق لازیمدیر یولدا چیخساق، بیر بیریمیزی ایتیرسك دردسره دوشریك.

-          یوخ من مواظیبم،تزه دن بیر یواش ضربه بوزائشگین یانینان ووردی.ائششك كولكی پیچاق كیمین كسیردی،آمما اوشاقین ائششگین اوسته هئچ حركت یوخدو، اؤلو كیمی ائششگین پالانینا یاپیشمشدی،آز گئدیب چوخ گئتمیشدیلر كی ائششك بیردن بیر چوخورا دوشدی آمما اؤزون ساغلادی و دیمیرلانمادی،بیر آغیر نفس چكیب یئردن قالخدی،بو حالدا اوشاق گؤزلرین آچیب دئدی:

-          آغا

 آغام گیل چوخ سئویندیلر كی اوشاق دیردی آمما اونلار یولدان آزمیشدیلار،بویان اویانا باخیب یولی تاپدیلار، آخی هم مشت‌قادرعمی و همده آغام تجربه لی بیر آدامیدیلار،اونلار یولا قئیدیب، گئتمگه باشلادیلار،قارین اوسته نئچه دامجی قان گؤردولر.

-          بو نه قانیدی؟

-          تولكیدن زاددان حتمن بیر حئیوان یئیب.

-          آمما بو قان بیزائله گئدیر.

-          ائششگی ساغلا.

دوردولار اوشاقین بویان اویانینا باخدیلار،هئچ زاد یوخودور.

-          اوشاق سالیمدیر.

-          مشت‌قادرعمی ائششگین گؤزی قانییب.

دونیا مشت‌قادرعمی نین گؤزونده فیرلاندی،تزآغام اولان یانینا گلیب ائششگین گؤزون نظردن كئچیتدی.

-          هئچ زاد اولماییب، بیر آز یارالانیب، او چوخورا دوشنده حتمن گؤزونه چؤب باتیب.

-          پارچا وارینیزدی؟

-          آغام دستمالین چیبنن چیخاردیب ائششگین بیر گؤزون باغلادیلار.

بوزائششگ‌یولا دوشمگه تله سیردی،او ایستیردی اؤز تاپشیریقین باشاچادیرسین.

گونلر پیس یاخچی كئچدیلر.

یازگلمیشدی،داركوچه نین قارلاری اریب گئتمیشدیلر،اوشاقلاركوچه ده چوخ شنلی یوناماقدایدیلار،مشت‌قادرعمی قاپینی آچیب بؤیوك قاب الینده گئدیردی مسجید قاباقینداكی شیردن سو گتیرسین.

-          سالام قادرعمی،پوروزه خالانین قیزی سالام وئرننن سونرا ایسته دی قابی مشت‌قادرعمی نین الینن آلسین.

-          وئر من گئدیم سو گتیریم.

-          ساغ اول بالا،اؤزوم گتیررم.

-          مشت‌قادرعمی بوزائششگین نئجوردی؟

-          واردای.

بوز ائششك بیر گؤزون الدن وئرمیشدی،یول گئدنده همیشه اؤزون ساغا چكیردی، ساغ یاندا هر نئجور قورخولی دره تپه ده اولسیدی اؤزون اونا یاخینلاداردی، كورشمز طرفدن گرك قورخاسان،كورونن طرفده نئجور خطرده اولسا اونی دف ائله مك مومكوندیر.

بؤلوم لر: اۆز یازیلاریم ،