قالب وبلاگ

سیدجعفر پیشه وری’نین رهبرلیگی آلتیندا آزربایجان دئموكرات فیرقه سی نین بیر ایل عرضینده گؤردویو ایشلَری بیر مقاله ده احاطه ائتمك ممكن دَییل. حركت، ایران’ین آزادلیق مبارزه سی، هابئله آزربایجان خالقی نین تاریخینده ائله بؤیوك حادیثه دیر كی، اونون باره سینده چوخلو یازیلمیش و بوندان سونرادا یئنه یازیلاجاقدیر … ۲۱ آذر نئهضتی و اونون رهبرلیگی سون گونه قدر، یعنی ۱۳۲۵-جی ایل آذرین ۲۰-نه قدر اؤز اینقیلابی خطلرینده آزاجیق دا اولسا دَییشیكلیك عمله گتیرمه میشدی. بیر آددیم دا اولست گئری چَكیلمه میشدی. عكسینه زنگان، تئهران جلادلاری طرفیندن قان دریاسینا چئوریلَندن سونرا آزربایجان’ین هر یئرینده تَزه روحییه ایله، ۱۳۲۴-جو ایل ۲۱ آذرده كیندن داها شیددتلی حاضیرلیق گئدیردی. خالق یئنی اومیدلرله میثیلسیز شكیلده سیلاحلارا ساریلیردی. او گونلر آزربایجان’دا اولمامیش آدام ستارخان اؤولادی نین بو درجه ده یوكسك اینقیلابی احوال-روحییه سینی تصوّر ائده بیلمز. بو گونلر ۲۱ آذر نئهضتی نین ایل دؤنومونه حاضیرلیقلا برابر مركزی كمیته و مرحوم سیدجعفر پیشه وری امری اسایندا “بابك” آدلی كؤنوللولر دسته سی یارانیردی. من بو كؤنوللولر دسته سی نین یارادیلماسیندا شخصاً ایشتیراك ائدیردیم. كؤنوللولر دسته سی سیراسینا داخیل اولماق ایسته یَنلر سایی او قدر ایدی كی، اونلارین هامیسینی مَشق اوچون تعلیمات مئیدانینا سیغیشدیرماق ممكن اولموردو. بو گونلر تبریز’ین بوتون محلله لرینده كی گئنیش یئرلر حربی تعلیمات مئیدانینا چئوریلمیشدی. تفنگ گؤتوروب تعلیمات مئیدانلاریندا مَشق ائله ین قادین و قیزلارین سایی كیشی لردن آز دَییلدی.

مرحوم پیشه وری’نین سونونجو دفعه آذرین ۲۰-ده سحر مركزی كمیته نین بیناسیندا گؤردوم. او، اولدوقجا توتقون و عصبی ایدی. مرحوم پیشه وری’ده بئله بیر حالتی ۱۳۲۴-جو ایل ۲۱ آذر گونو سحر سرتیپ درخشانی ایله مذاكیره دن قاییداندا پاساژدا گؤرموشدوم. لاكین، اوندا گؤزلرینین ایچی گولوردو. اوزوندن موفقیت یاغیردی. دایانیب گوله-گوله: “اوغلوم، ایشلر نئجه گئدیر؟ زنگینه تسلیم اولماق ایسته میر ( زنگینه اورمییه’ده كی حربی قارنیزونون رئیسی ایدی ) اورمییه’یه كمك گؤندرمك لازیمدیر. ایشلر دوزه لر ان شاء الله” دئییب تله سیك گئتدی. لاكین سونونجو دفعه من اونو گؤرنده باشینی آشاغی سالیب، هئچ نه دئمه دن اؤز اوتاغینا گیردی. سونرا اونو بیرداها گؤره بیلمه دیم …

مرحوم پیشه وری نین ایران’ی ترك ائتمه مسئله سینده چوخلو سی̊رلار واردیر. لاكین هله لیك بونلار آچیلمامیشدی. اونون شورَوی’دن ایران’ا قاییتماغا چالیشماسی و بو چالیشمالار زامانی گؤزلَمَدن وفاتی بو سی̊رلَرین چوخ مَكیرلی و مركّب اولماسیندان حئكایت آچیر.

یایینا حاضیرلایان: آرازنیوز آراشدیرما مركزی اَمَكداشلاری