قالب وبلاگ

اوستاد علیایی ساهر ادبی- مدنی درنه‌یی‌نین آق ساققال‌لاریندان اولماغینا باخمایاراق, بوتون آذربایجان ادبیاتی و اینجه‌صنعتی ساحه‌سینده فعالیت گؤسترن ادبی- مدنی درنك‌لرین جیددی حامیسی اولوبدور و اوزون ایللر بو درنك‌لرین قورولوب و ثمره‌لی فعالیت ائتمه‌لرینده اونودولماز رول اویناییبدیر.

اوستاد علیایی‌نین آنیم مراسیمی شهریور آیی‌نین دؤردونجو گونو(دوشنبه) یاشادیغی كرج شهرینده (فردیس‌ده) كئچیریله‌جكدیر. اوستادین سون سؤزونه اساسلاناراق بو مراسیم اونون شخصی ائوینده اولاجاقدیر.

بیز ادبیاتیمیزین اونودولماز خادیم شخصیتی و انسان‌سئور, وطنپرور شاعری اوستاد آقازاده علیانی‌نین شرفلی خاطیره‌سینه عشق اولسون دئییر و بیر داها خاطیرلادیریق كی:

ازلدن یارانیب چونكی كائینات

جاهان دائیمی‌دیر, عؤمور آمانات

الدن اله كئچیر وفاسیز حیات

بیز گلدی- گئده‌ریك سن یاشا دونیا!

“ایشیق” سایتی‌نین اداره هئیتی و ادبی شورا عضولری

اوستاد علیایی‌دن ایكی شعر:

(۱)

قارا گونلر قاراسین گوندوزه دؤندرمك اولار

بولبولو باغچالارا، باغلارا گؤندرمك اولار

قارا ظلمت تؤره‌دن كس قانا بیلمز بو سؤزو

عرشه‌ده چاتسا اونو عرشدن ائندیرمك اولار

آنلامیر خلقیمیزین “قوچ نبی”سی، “روشن”ی وار

فتح اوچون اونلاری‌دا میدانا گؤندرمك اولار

بمبالارلا بیلیرم سوسمایاجاق شانلی ائلیم

بیر یانار وولقان اولارسا اونو سؤندورمك اولار

قول- قولا وئرسه ائلیم دونیانی آزاد ائده‌‌ریك

دیل آچیب، شاعر اولوب ملتی دیندیرمك اولار

غم- كدر چولغاسادا اؤلكه‌می “علیا” بیلیرم-

دؤورانی گلسه یئنه ملتی گولدورمك اولار.

(۲)

اؤز آییم، اؤز اولدوزوم وار اؤزگه ماهی نئیلیرم

وار ساری تئل دلبریم، زلف سیاهی نئیلیرم

ناز باخیشلار كؤنلومو یوز دفعه مفتون ائیله‌ییب

بیر دؤنوب باخسا یاریم اؤزگه نگاهی نئیلیرم

ائل یولوندا چاشمارام، آیری طریق آختارمارام

من غریبه مسلكی، بیگانه راهی نئیلیرم

داغ تكین سؤیكنمه‌یه شانلی ائلیم واردیر منیم

اؤزگه‌لردن تكیه‌نی، پشت و پناهی نئیلیرم

بیر هارای وورسام جوشار سئللر كیمی قوچ بابكیم

خائن افشین‌لر سایاقدا دادخواهی نئیلیرم

“علیا” نازلی سئوگیلیم شاهددی عشق پاكیمه

عشقیمین اثباتینه آیری گواهی نئیلیرم.

قایناق: http://ishiq.net

بؤلوم لر: بو بیر آدی؟؟؟،