قالب وبلاگ

  حَیط زهملی، عئینی زاماندا شوبهلی بیر سسسیزلییه غرق اولموشدو. هاوادا یونگولجه دویولان حئیوان قوخوسو سانكی هیجانلی بیر اینتیظاردان خبر وئریردی. آنجاق جیرولامو ایله آناسی ائله بیرینجی قفسین قارشیسیندا گؤرونموشدولر كی، اؤنجه ایتلردن بیری، سونرا ایكیسی، داها سونرا اوچو، سونوندا، ایتلرین هامیسی بیر آغیزدان هوروشمیه باشلادی. جیرولامو حیسس ائتدی، هوروشلر چئشیدلی دیر، ائله بو سسلری چیخاران ایتلرین اؤزلری كیمی - كسكین زینییلتیدن توتموش، درین، قولاقباتیریجی هوروشه قدر. آنجاق اونا ائله گلدی كی، بو قاریشیق سسلر كورونو هانسیسا عومومی بیر نوت بیرلشدیریردی: سون درجه آنلاشیقلی اولان، اورك سیزلادیجی بیر یالواریش نوتو. او، دوشوندو، بوتون بو هوروشلر اونا عنوانلانیب، اونا گؤره ده یوبانمادان سئچدییی ایتی گؤتوروب اورادان گئتمك ایسته دی. آناسی نین قولوندان یاپیشیب بیر ده دئدی:  

  - آنا، قریفون آلتمیش سایلی قفسده دیر.  

  - بو دا آلتمیش سایلی قفس، - دئیه آناسی سؤیله دی.  

  جیرولامو ایچری بویلاندی. بئش گون اؤنجه، گون اورتا بورا گلنده بو قفسده سون درجه اویناق ، شیلتاق گؤرونن، كؤمور كیمی گؤزلری، آغ-آپپاق دیشلری اولان قارا رنگلی، بالاجا بیر ایت واردی. او، جیرولامونو گؤرجك هوره-هوره اونا ساری آتیلمیش، پنجه سینی دمیر شبكه دن اونا اوزاتمیشدی. اونلار دا ائله بو او ایتی گؤتورمیی ایسته میشدیلر. آنجاق اونلارا دئمیشدیلر، ائرته سی گون سحر، حئیوانلار ساتیشا بوراخیلان واخت گلسینلر. ایندی ایسه، ائله بیل قفس بوش ایدی. داها دوغروسو، جیرولامو بیر قدر ایچریده، سانكی اؤتری بیر اوشوتمه دن آرابیر دیكسینه رك اوزگون، سؤنوك باخیشلاری ایله اونا باخان شاه بالیتی رنگلی، بالاجا، دونقار بیر ایت گؤردو. بو دفعه  او، سسینده كی  اومیدسیز بیر وورغو ایله دیللندی:  

  - آنا، قریفون آرتیق اورادا یوخدور. 

  - یقین اونو باشقا قفسه كئچیریبلر - دئیه آنا تانینماز بیر طرزده جاواب وئردی. - سؤزسوز كی، اگر یییه سی اونون دالینجا گلمه ییبسه. ایندی گؤزتچیدن سوروشاریق.  

  بو واخت ایداره بیناسی ساریندان قاییدان آتا گؤروندو:  

  - ایشچی بیر آزدان گله جك. هله لیك گئدك ایتلره باخاق...  

  والیدئینلر آلتمیشینجی قفسین یانیندا دایانیب گؤزتچی نین گلمه سینی گؤزله مك ایسته ین جیرولامویانی سایمادان حَیطده گزیشه رك ایتلری بیر-بیر گؤزدن كئچیرمه یه باشلادیلار.  

  جیرولامو سانكی اوریینه داممیش آنلاشیلماز، آجی دویغولار دومانی آرخاسیندان آناسی نین دئدییی سؤزلری ائشیتدی:  

  - اؤتن دفعه  بورادا بیر جوت جینس ایت ده واردی. بیر بولداق، بیر ده اوو ایتی. دوزو، اینانیلمازدیر كی، بورا بئله لری ده دوشورلر .  

  آتا جاواب وئردی:  

  - آخی، اونلار دا ایته بیلیرلر. یا دا، گؤرورسن بعضیلری اونلاری بیلركدن آزدیریر. بیر چوخ اینسانلار وار كی، اونلارا یوك اولان یاخینلاریندان دا بو یوللا جانلارینی قورتارماق ایستردیلر، آنجاق نئینه سینلر كی، ایتلرله اوركلرینی بوشالتمالی اولورلار.  

  ایتلر اومیدسیزجه سینه هوروشوردو. جیرولامو دا بو هوروشلرین آراسیندا اؤز قریفونونون سسینی ائشیتمه یه چالیشیردی. آتا دوداقلاری نین اوجوندا یاواشجا دئدی:  

  - بیلیرسن، منه ائله گلیر كی، حَیط ایتلری جینس ایتلردن داها یانیقلی اولاییرلار. 

  - ائله نییه؟ 

  - چونكی باشا دوشورلر كی، جینس دئییللر . آزاد اولماغا دا گومانلاری آزدیر. 

  آنا چییینلرینی چكدی:  

  - اونلار كی، آنلامیرلار جینس یا ملز اولماق نه دئمكدیر. بو فرقی، یالنیز اینسانلار بیلیر.  

  - یوخ، اونلار دا بیلیرلر، نییه كی  گؤرورلر ، اونلارلا باشقالارینا گؤره پیس داورانیرلار. كیمسه ده اونونلا پیس داورانیلدیغینی گؤرنده، اؤنجه همیشه ائله دوشونور، بوندا گوناهكار باشقالاریدیر، آنجاق سونرا گئت-گئده آنلاماغا باشلاییر: بوتون گوناه یالنیز اونون اؤزونده دیر. سؤزسوز، ملز اولماق اؤز-اؤزلوگونده ائله بیر گوناه دئییل، آنجاق گوناه او واخت اوزه چیخیر كی، سنینله فرقلی شكیلده داورانماغا باشلاییرلار.  

  - ائئه، سنین ده، همیشه كی  كیمی، بو خیرداچیلیغیندان اولمایا.  

  اونلار بیر قفسین قارشیسیندا آیاق ساخلادیلار. هله چوخ بالاجا، آغ-ساری خاللاری، اویغونسوز پنجه لری ایله باشی اولان آریق، مزه لی ، بیچیمسیز بیر كوچوك قاباق پنجه لری ایله دمیر توردان یاپیشمیشدی. او، دال پنجه لری اوسته قالخاراق، چوخ ایفاده لی شكیلده زینییلده ییر، عئینی زاماندا، جیرولامونون الینی یالاماغا، پنجه سینی اونون اووجونون ایچینه قویماغا جان آتیردی. آنا گؤستریجی لؤوحه ده كی  یازینی اوجادان اوخوماغا باشلادی:  

  - ملزدیر.  " سئتتی كیئزی "  كوچه سینده توتولوب. سونرا او، آتایا ساری چئوریلیب دئدی:  

  - بودور، بو او زاواللیلارین بیری… آی آللاه، نئجه ده عئیبجردیر!.. بو  " سئتتی كیئزی "  كوچه سی هانسی یؤنده دیر؟  

  - كریستوف كولومب كوچه سی یؤنونده، - دئیه آتا جاواب وئردی.  

  كوچوك دورمادان زینییلده ییب سانكی جیرولامو ایله دوستلوق سؤزلشمه سی باغلاماق ایسته ییرمیش كیمی، پنجه سینی ائله هئی اونون الی نین ایچینه سوخماغا چالیشیردی. آخیر كی، جیرولامو اونون پنجه سینی سیخدی . ایت بوندان سونرا ائله بیل بیر آز سسسیزلشدی.  

  آنا سوروشدو:  

  - دئییرلر حَیط ایتلری جینس ایتلردن داها عاغیللی اولور، ائله دیر؟  

  - اینانمیرام. آنجاق، كسین، بو شایعه نی جینس ایتلر اؤزلری یاییبلار، - دئیه آتا ظارافاتلا سؤیله دی.  

  - ائله نییه؟  

  - او عاغیل دئییلن شئیی گؤزللیك، حسساسلیق، جسورلوق لا بو كیمی باشقا اؤزللیكلرله توتوشدورمادا دیردن سالماقدان اؤترو.  

  اونلار ایرلی لییب بیر باشقا قفسین قارشیسیندا دایاندیلار. قفسده، ائله قفسین اؤزو بویدا، اورا گوجله یئرلشن ساریمتیل، سئیرك توكلو، قیزارمیش گؤزلری، ایله آجیقلی باخیشلاری اولان، سون درجه آریق بیر قویون ایتی واردی. جیرولامو اونا یاخینلاشماق ایسته یندی، ایت میریلداماغا باشلادی، آغ-آپپاق، ایتی دیشلرینی قیجیییب ایره لی آتیلدی. بو آنی غضب گؤستریشینده او، سانكی بیر قدر جاوان حتّی گؤزل ده گؤروندو. جیرولامو قورخاراق گئری چكیلدی، آنجاق، عئینی زاماندا، او  " سئتتی كیئزی "  كوچه سیندن توتولموش بالاجا حَیط ایتی نین آنلاملی-یانیقلی زینییلتیسینی قویون ایتی نین آجیقلی میریلتیسی ایله توتوشدوراندا، حیسس ائتدی، باشینا نلرین گلدییینی هله ده آنلامایان بو قویون ایتینه اونون داها چوخ یازیغی گلیر. آنا دئدی:  

  - گؤر بیر نئجه ده عئیبجردیر! گؤره سن قودوز دئییل؟  

  - یوخ، قودوز اولسایدی، ساخلامازدیلار. باغلاییبلار، اونا گؤره ده میریلداییر، - دئیه آتا باشا سالدی.  

  جیرولامو دیقتله قویون ایتینه باخیردی. اونا ائله گلیردی، بئلجه، فیكرینی یاییندیردیقجا قلبینی سیخان آغیر بیر هؤووشنه دن قورتولور. سونرا او آنلادی ، بو آغری، اونلارین هله ده تاپا بیلمدیكلری قریفونون فیكریدیر. او، بیردن، گؤزلنیلمدن سوروشدو:  

  - آنا، بس قریفون؟  

  - ایشچی گلر، بیلریك.  

  ایندی اونلار كوچه دن توتولموش باشقا بالاجا بیر ایتین قفسی قارشیسیندا دایانمیشدیلار. ایت بوینو اوسته چؤكوب، چتینلیكله نفس آلیر، تیر-تیر اسیردی. جیرولامونون اوریی سانكی بیردن یئریندن قوپدو:  

  - اونا نه اولوب، او خسته دیر؟ 

  آنا بیر قدر دوشونوب دئدی:  

  - یوخ، خسته دئییل، بیر آز گرگیندیر.  

  - آخی نییه؟  

  - بس اگر اؤزون بیردن ایتیب-ائلسیدین ، سنی ده عاییله میزدن اوزاق، یاد بیر یئره آپارسایدیلار، گرگین اولمازدین می؟ 

  - بس یییه سی اونون دالینجا گله جك؟  

  - البتته، گله جك. 

  - بو دا ایشچی - دئیه آتا بیردن اوجادان سؤیله دی. 

  ایشچی ساچلارینی قیسا ووردورموش، سیوری بورون پارلاق، گؤی گؤزلری اولان جاوان، ساریشین بیر اوغلاندی. او، لنگر وورا-وورا یاخینلاشیب، بیر-ایكی آددیملیقدان سالام وئردی. آنا دئدی:  

  - بیز بالاجا قارا قریفوندان اؤترو گلمیشیك. خاطیرلاییرسیز؟  

  - هانسی قریفون؟  

  - آلتمیش سایلی قفسده كی ، - دئیه جیرولامو ایره لی چیخدی.  

  - سیز اونو آلتمیشینجی قفسده گؤرموسونوز؟ - دئیه ساریشین سئزیلن دیالوگلا، سسینی اوزادا-اوزادا سوروشدو. - آخی او، آرتیق اورادا یوخدور.  

  - گؤردون، آنا، گؤردون؟ - دئیه جیرولامو اوجادان سؤیله دی.  

  آناسی اونا سوسماغا ایشاره ائله دی، سونرا ایشچییه دؤنوب دئدی:  

  - بلكه، كیمسه گلیب اونو آپاریب؟  

  - یوخ، آنجاق قایدایا گؤره ایستنیلن اوچ گون، هله اوسته لیك ایكی گون ده كئچدییینه گؤره بیز... گؤرونور، ساریشین جاوابی یونگوللشدیرمكدن اؤترو اویغون سؤزلر آختاریردی، آنجاق سونرا فیكیرلشدی، دوزونو دئسین:  

  - بیز اونو قاز كامئراسینا گؤندرمیشیك.  

  - آخی بیز دئمیشدیك كی، اونون دالینجا گلجییك! 

  - حاقلیسیز، سینیورا، دئمیشدینیز، آنجاق سونرا گلیب چیخمادینیز. بیزده ایسه قایدا بئله دیر...  

  - هفته ده نئچه سینی اؤلدورورسوز كی؟ - دئیه آتا ساریشینا یاخینلاشاراق الینده كی  سیقار قوتوسونو اونا اوزاتدی. ساریشین تشككور ائدیب بیر سیقار گؤتوردو، اونو قولاغی نین آردینا تاخیب دئدی:  

  - بئله ده، هفته ده اونونو، اون بئشینی.  

  جیرولامو هئچ نه آنلامیردی. سونوندا  او، درین بیر هیجانلا آناسیندان سوروشدو:  

  - آنا، قاز كامئراسی نه یه دئییرلر؟  

  آنا اؤنجه ترددود ائتدی، سونرا قورو، نصیحتلی بیر طرزده دئدی:  

  - یییه سیز ایتلر قودوزلوق یایا بیلرلر، بو ایسه چوخ قورخولو خسته لیكدیر. اونا گؤره ده بئله ایتلری قاز كامئراسینا یئرلشدیریرلر ،اونلار اورادا عذاب چكمه دن اؤلورلر.  

  - دئمه لی، قارا قریفون دا اؤلوب؟  

  آتا الینی اوغلونون چیینینه قویوب دئدی:  

  - بئله گؤرونور كی، او دا.  

  اونلار بیرلیكده چیخیشا دوغرو آددیملادیلار. آناسی جیرولامویا دئدی:  

  - من بو گون بورادا ائله بیر ایت گؤرمدیم كی، اونو آلماق ایستییدیم. آنجاق بو یاخین گونلرده بیز یئنه گلیب اونلاردان بیرینی سئچریك. ائله می؟  

  جیرولامو هئچ نه دئمه دی. ایندی او پنجه سینی اونون الی نین ایچینه قویان بالاجا حَیط ایتینی دوشونوردو. آنجاق اونا ائله گلیردی، آرتیق نه او ایتی، نه ده باشقا بیریسینی قورتارماق مومكون اولمایاجاق. او، حیسس ائدیردی، هر یاندا چكینمز قاریشیقلیق، آغلاسیغماز اعتیناسیزلیق حؤكم سورور. اونلار یولو كئچیب ماشینا ساری گئتدیلر. آتا ماشینین قاپیسینی آچاراق دئدی:  

  - سیزین بو ایت احوالاتینا گؤره من سحر بوتون واختیمی ایتیرملی اولدوم. ایندی گرك ماشینی سورعتله ایشه قووام.  

  اونلار ماشینا كئچیب، اوچو ده قاباق اوتوراجاقدا اَیلشدیلر. جیرولامو بیردن دئدی:  

  - آنا، من بیلیردیم، من بیلیردیم، سراغاگون گلمك لازیم ایدی. آخی من سنه دئمیشدیم، آنا. دونن ده، سراغاگون ده سنین اوتاغینا گلیب دئمیشدیم.  

  گؤرونور اوغلونون دانیشیق طرزی آنانی تعجوبلندیرمیشدی، او، بیر قدر سرتلیكله دئدی:  

  - هه، سن گلمیشدین، آنجاق من او گون گئده بیلمدیم، یورغون ایدیم، دینجلمه لییدیم. 

  - آخی سن نییه او گون گئتمه دین آنا، نییه؟  

  - من كی، سنه دئدیم، چونكی یاتمیشدیم.  

  - هه، آنا، سن یاتمیشدین، یاتمیشدین.  

  بیردن، جیرولامودان ائله بیر هؤنكورتو چیخدی كی، آرتیق ماشینی حركته گتیرمه یه حاضیرلاشان آتاسی موتورو سؤندوروب تئز دیللندی:  

  - یاخشی، یاخشی، آغلاما. گلن هفته آنان سنین اوچون بیر باشقاسینی تاپار. 

  آنجاق جیرولامو تكرار-تكرار، هم ده ائله اوجادان هؤنكوردو، اؤزو ده شاشیردی:  

  - سن یاتمیشدین آنا، یاتمیشدین، یاتمیشدین...  

  آتا موتورو یئنیدن ایشه سالاراق بیر ده دئدی:  

  - یاخشی، یاخشی آغلاما! كیشی آغلاماز!  

  آنا:  

  - بو اوشاق نه واختدان بریدیر كی، اؤزونو یاخشی حیسس ائتمیر. حددن آرتیق عصبی اولوب.  

  بئلجه  ماشین یولا دوشدو...  


بؤلوم لر: یولداشلار،