قالب وبلاگ

فیكیر بئینینین عصب سللولاریندا قیمیلداماغا باشلاییر. گؤز قاپاقلارین قاپانیر. ساعاتا باخماغین گلمیر. ندنسه قالخماق زامانی یئتیشدیینده، نه اولور، اولسون، ساعات دورمادان زیل چالاجاق. سن یئریندن قالخاجاقسان. ساعاتین زیل سسینی سؤندوره‌جكسن. ال- اوزونو یومامیش، آشپازخانایا گئده‌جكسن. اوجاغین اوچ شعله‌سینی ، یاندیراجاقسان. چایدانا سو دولدوراندا، هر گونكو كیمی، آبگرمكن دان غیرعادی فیسیلتی سسی قالخاجاق. هر گونكو كیمی فیكیرله‌شه‎جكسن:« یادیمدا اولسون تعمیركارا زنگ ووروم» چایدان اوجاق اوستونده چیسیلدایاندا، سن ایكی قاشیق تورك قهوه‌سی، ایكی قاشیق شكر، قهوه جوشا بوشالدیب، قاشیغین دالیسیلا قهوه‌ایله شكری بیر- بیرینه قاتاجاقسان. شكرین خیرچیلتی سسی اوره‌یینی دیده‌جك. ایكی فینجان سو، قهوه جوشا بوشالدیب، اوجاغین شعله‌جیكینین اوستونه قویوب، شعله‌نین خودونو آشاغی چكه‌جكسن. روف سود قابینا گؤز عیاری بیراز سود بوشالدیب، اوجاغین اوچونجو شعله‌سینین اوستونه قویاجاقسان. توالته گئده‌جكسن. دیشلرینی فیرچالادیغیندا، اوجاغین اوزه‌رینده‌كی سودایله، قهوه‌نی دوشونه‌رك، تلم- تله‌سیك آغزینی لیلیخلاییب، آشپازخانایا دوغرو قاچاجاقسان. كؤپویو قالخمیش سودون شعله‌سینی سؤندورب، قهوه جوشو یوخلایاجاقسان. ‌قهوه، قایماق باغلایاجاق؛ قایماغین قیراقلاریندان یاواش- یاواش قایناماغا باشلادیغیندا، قاینامادان اوجاغی سؤندورمه‌لیسن. چایدانین لولویوندن بخار قالخاجاق چاینیكه بیر آتیملیق چای، بیر بارداق بویوندا قاینار سویو سوزوب، یئنی‌دن اوجاغین اوستونه قویاجاقسان. نئجه ده اولسا، یاشام یولداشین گیلاناری رنگینده چایی بینیر. قهوه‌نی فینجانلارا سوزمه‌دن آشپازخانادان بویلانیب، اوغلانلاری سسله‌یه‌جكسن« اوشاقلار دورون اَیاغا…بئواخ دی» قهوه‌نی فینجانلارا سوزوب میز اوستونه قویاجاقسان. اوشاقلارین اوتاغینا دوغرو گئده‌جكسن. یئددی یوخونون ایچینده‌دیلر. بیر داها سسله‌یه‌جكسن« آی بالا… دورون آخی بئواخ‌دی… یوبانارسیز هااااا…» اوغلانلار اؤزلرین ائشیتمه‌مزلییه ووراجاقلار. سنسه «واللاه  دا چاغیرمیاجام  هاااا…. دورون اَیاغا….ساعاتا بیر باخین….» اوغلانلار یئرلرینده گئرنه‌شنده سن اؤز اوتاغینا گئده‌جكسن. گوزگوسوز اوتاغیندا، گؤزلرینین آلمالیغینین آلتیندا، گونو- گوندن آرتان چیزگی‌لرینه كِرِم چكه- چكه كامپیوترینی یاندیراجاقسان. ناركوتیكه آلیشقانلیق كیمی، ایشه گئتمه‌دن ایمیل لرینی یوخلاماق، فیس بوكا گؤز دولاندیرماق دئییشیلمز عادت كیمی اولوب سنه. فیس بوكدان سورویله گلمیش ایمیل‌لری پوزاجاقسان. “وی كیو” و “پارس بوك” دان گلمیش ایمیل لرده، نئت كیتابلارینین آدینا باخاجاقسان. گون اولمور كی بیر نئچه نئت كیتابی بو سایتلاردان نئت ایشله‌ییجیلرینه گؤندریلمه‌سین. ایشینه گلن كیتابلاری دانلود ائده‌جكسن. سونرا گؤز اوجو فیس بوك پئیجینه باخاجاقسان. گؤزون یازیلمادیغی سؤزلری آختاراجاق. یازیلارا باخا- باخا، فیكیرین، سؤزو سؤزدن آییراجاق. كیم كیمه نه یازیب، كیم كیمین یازیسین اوخویوب دا، بیه‌نیب، كیم كیمین یازیسین اوخومامیش بیه‌نیب؛ كیم كیمین یازیسینی دئییل، شكیلینی بینیب….

كامپیوترین اؤنوندن قالخدیغیندا، فیس بوك آلیشقانلیغیندان زهلن گئده‌جك. دونیانین ال چاتیلماز بیر نوقطه‌سینه گئدیب، یالنیزلیغینی اؤزون و اؤزلویونله یاشاماق ایسته‌یه‌جكسن.

اوشاقلار گئیینیب، ائودن چیخدیقلاریندا، سن یئنی‌دن ساعاتا باخاجاقسان. اوغلانلارین اوتاغینین گوزگوسونه گؤز اوجو باخیب، ساچلارینین آغینا، قاراسینا باخمادان، ساچلارینی  دارایاجاقسان. ایللردی قاین‌آنان دونیادان كؤچوب. اونون گئدیشی‌ایله سنین سورمه قایناغین دا قورویوب. گؤزلرینی سورمه یئرینه قارا میدادلا  قارالاماسان، یاتالیغا دوشموش ناخوشلارا اوخشایارسان.

اداره‌نین سرویسینین گلیشینه آزجا زامان قالاجاق. آرتروز آغریلارین  شدتلنمه‌سین دئیه، سودایله، بال قاریشیمینی ایچه‌جكسن. گئیینیب، قاپیدان چیخمادان چایدانین آلتینداكی شعله‌نی سؤندوره‌جكسن. سحرین شیرن یوخوسونا دالمیش، فیس- فیس فیسلدایان یاشام یولداشینی سسله‌یه‌جكسن« من گئتدیم. یوبانارسان هااااا»

قاپیدان ائشییه چیخدیغینندا دؤرد قات آپارتمانین ائولرینیدن قالخان قوخولار بورنونا دولاجاق. دیوار بیر قونشونوز نئجه هر گون یئدییی املت دن چییریمیر دئیه، دوشونه‌جكسن. پیلله‌‌لری آشاغی ائندیینده، یئنی بیر ایش گونونون سحری اوزونه آچیلاجاق. عینالی گئنه گؤزونده قیزاراجاق. هر گونكو كیمی عینالی یا سلام دئیه‌جكسن. اویسا، سایماز- سایماز سنه باخاجاق. سنسه هر گونكو كیمی اوره‌یین داریناجاق. داریخماغین باشلاناجاق…

یاتاغینداسان. گؤزون گوندوزه آچیلیب. سولونا دؤنورسن. باغیرنا باسدیغین یورقان، یاتاغیندان یئره دوشور. گؤیولسوز ساعاتا باخیرسان. گؤزون عقربه‌لره توخوندوغوندا، هؤله‌سك یئریندن قالخیرسان. گئج قالیبسان دئیه دوشوندویونده، یاددایشیندا آیین دؤردونجو گونو اولدوغو، یادینا دوشور. نه ده اولسا، سحرینه گؤز آچدیغین گونون تعطیلینی ۱۴۰۰ ایل اؤنجه‌كی تاریخه بورجلوسان. هله اؤنونده بیر باشقا تعطیل گونو وار دئیه، دینجلیكله یاتاغینین قیراغیندا اوتورورسان. ایسته‌مه‌دن تاریخین دوزاغینا دوشورسن. صاباح ثقه‌الاسلام یئددی كیشی‌ایله بیرلیكده، تبریزده دارا چكیله‌جك. روسیه‌ ۱۹۱۷ینجی ایللرینه گئری دؤنمه‌یه‌جك. داها اكتبر انقلابی اؤز وئریب، هئچ بیر هئیت تقه‌الاسلامین مزارینا گول چلنگی دئییل، بیر یارپاق چیچك  بئله گتیرمیه‌جك.

تاریخین دوزاغیدان قورتولماق ایسته‌ییرسن. ۱۳۰۰ ایللریندن اوزاقلاشیب، ۱۳۲۴نجو ایله یئتیشدیینده، آنان سؤیله‌دیی خاطیره‌لر یادداشیندا دیریلیر. ۸۱ یاشی اولسادا، او ایللرده مدرسه‌ده  اوخودوغو شعرلر، درس‌لر، آیدین- آشكار یادداشیندا قالیب:

ای بیزی یوخدان یارادان تانریمیز

سن بیزه لطف ائیله، عنایت ائله

بیزلری دوزگون یولا، دوز ایشلره

قدرت ذاتین‌لا هدایت ائله

سن آتامیزلا، آنا، اوستادیمیز

راضیلیغین بیزلره قیسمت ائله

تاریخین دوزاغینا دوشَرسن، قورتولاجاغین اولماز. قوی ۱۳۲۵ینجی ایلین آذر آیینین آغری- آجیسینی تبریزین بئلی سینمیش ارگی چكسین، دئییرسن. یاتاغیندان قالخیرسان. آشپازخانایا دوغرو گئدیرسن. اوجاغین بیر شعله‌سین یاندیریرسان…

بؤلوم لر: یولداشلار،