قالب وبلاگ

Allahım! Məni özümdən Sənə götür! Allahım! Məni özünə götür ki, özümdə özümdən heç nə qalmasın!

Varlıq Allahın zarafatıdır (Bu deyimimin cavabında Nəriman Qasımoğlu soruşdu: “Tanrı aləmləri əyləncə üçün, yaxud əyləncə olaraq yaratmadı” ayəsi necə olsun? Mənim cavab cəhdim: Bəlkə, Tanrı əyləncə üçün zarafat etmir. Sadəcə, dünyada bizə nonsens görünən elə zarafatsayağı nəsnələr, durumlar yaradır ki, ağlımız çaşsın və gülüşlə təəccübün arasında qalsın ki, dünyanın, Allahın ağılasığmazlığını bilsin). 

Allah hər yerdədir, ancaq hər yerdə bir cür deyil, bircürlük verəndir.

Dində olmaq çətindir, çox adam dində olmağı asanlaşdırmaq üçün dini asanlaşdırıb korrupsion bilincinə rahatlıq gətirir.

Həmişə rahatlıqda, işlərin yaxşı getdiyi yerdə insanın Allahı primitivləşdirməsi var. Bu üzdən Allah sevimli bəndələrini dərdə və əziyyətə salır. Ancaq sevmədiklərini də unutmur.

Tanrı bu dünyanı elə qurub ki, bir dərdin daha ağır örnəyini görüb özünü ovundurursan.

Allah bizim maddi təbiətimizlə elə hey eksperimentlər aparır ki, görsün, bu təbiət yenə hansı oyun çıxaracaq.

Allah psixolojimizi elə qurub ki, nankorluğa və Ondan şübhələnməyə yönəlirik. Deməli, möminlik psixologiyanın bu meylinə qalib gəlmək və çətinliyi adlayıb Allaha inanmaqdır.

 

Niyazi MEHDİ

fəlsəfə elmləri doktoru, professor

 

بؤلوم لر: یولداشلار،