قالب وبلاگ

گلمگیمه فیكیرلشیردیم. دوزونو ایسته سنیز بیر شئیلر فیكریمه چاتیردی. آمما ایسته ردیم بیر كیمسه دن یاردیم آلیم. آناما اوز توتدوم و اوندان ایسته دیم كی منیم یاردیمجیم اولسون. آنام چوخ محبتله ماراق گؤستردی. سوروشدوم:

-          آنا جان، منیم دونیایا گؤز آچدیغیم چاغدان دانیش !!. آنام باشلادی سؤزه، منیم گؤزلریم تیكیلدی آنامین گؤزلرینه.

-          قیزیم سنی دوققوز آی قارنیمدا دولاندیرمیشام. او دوققوز آیدا سنین بویووا گؤزل – گؤزل اوخشامالار اوخشامیشام. گون او گون اولوب كی زامانی چاتیب، بالام دونیایا گؤز آچسین. دوغرودان – دوغروسو بیلمه دیگیم كلمه لر، او زامان دیلیمه گلیردی. دوزدور كی چوخ چتین بیر لحظه لردیر. آمما عؤمرومون ان شیرین لحظه سی او زاماندیر. من آنامین سؤزونون آراسینا آتیلیب، سوروشدوم:

-          او چتین زامان سنین اوچون نییه بس شیرین ایدی؟

آنام دئدی :

-          آنا اولماسان بیلمه سن، من او حالدا سنین ساغ – سالامات دونیایا گلمگیوین فیكرینده ایدیم. دئیردیم بالاما بیر زاد اولماسین. آللاهدان اؤزومه اؤلوم، اوشاقیما حیات ایستردیم.

داها منیم گؤزلریم یاشلا دولموشدو. بیر آنا كی اؤلومه قارشی – قارشییا منی یاددان چیخارمیر، منی آتمیر،من نئجه بو آنانین دیلینی یاددان چیخاردیم، اونون اوچون دئییرم:

 

آنا دیلی اؤلن دئییل

اؤزگه دیله دؤنن دئییل.

یازار: آیدا ابراهیم پور

 

بؤلوم لر: یولداشلار،