قالب وبلاگ

1-      قاراوللی جانری شیفاهی خالق ادبییاتینین ایپك نؤومونهداخیلدیر و موستقیل بیر جانردیر.

2-      قاراوللی لرده ایجتماعی حیاتدا و معشیده كی چاتیشمازلیقلار، نوقصانلار تنقید ائدیلیر.

3-      قاراوللی لر ناغیل لارلا لطیفه لرین حودودوندا دایانان بیر جانردیر.

4-   قاراوللی اؤزونون بیر سیرا سجیوی خوصوصییات لرینه گؤره شیفاهی خالق ادبییاتنین دراماتیك نؤوعنه یاخیندیر. بونا گؤره ده قاراوللی لر اساسیندا " قاراوللی" تاماشالاری حاضیرلانیر.

5-      قاراوللی لر ساتیریك و یوموریستیك سجیئلی ، نوْوئللاواری اولوب حؤكمن گؤزله‌نیلمز سونلوقلا قورتاریر.

قئید ائدییمیز كیمی ، قاراوللی لر اساسیندا " قاراوللی " تاماشالاری دا حاضیرلانمیشدیر. بو " قاراوللی" تاماشالاری آزربایجان خالق مئیدان تئاتیرینین ، خالق تاماشالارنین بیر نؤوع اولموشدور."قاراوللی" تاماشالاری جمعیتدكی ناقیصلیكلرله ،چاتیشمازلیقلار، ایجتیماعی موحیطین عیبه‌جرلیكلرییله قطعیئتله موباریزه آپارمیش ، توفئیلی، نادان، فیریلداقچی و ظالیملری ، عومومیتله، هر جور منفی اۆنسۆرلری آمانسیز ساتیرا  آتشینه توتموشدور. "قاراوللی"تاماشالارینداكی گولوش حقیقتی ، عدالت، هومانیست ایدئاللاری ایفاده ائتمك اوچون بیر واسیطه اولموش، تاماشاچیلاری معنوی صافلیغا و تمیزلییه چاغیرمیشدیر.

"قاراوللی"تاماشالاری ماهییت اعتیباریله سینكرئتیك خاراكتئرلی تاماشالار اولموشدور. باشقا سؤزله ، بو تاماشالاردا موسیقی ، رقص ، ماهنی، سؤز،لیریكپارچالار،كینایه‌لی گولوش ، یومور ، ساتیرا ، اله سالما و س. كیمی خوصوصییاتلار عضوی شكیلده بیرلشمیشدیر.

"قاراوللی"تاماشالاری  حاققیندا م. عاریف بئله یازیردی: " توی مجلیسله رینده قهرمانلارین مغلوبییاتی ایله بیتن بؤیوك ناغیل و داستالاردان سونرا تاماشاچیلارین كؤنلونو آچماق و " تراگئدییانین"آغیر تاثیرینی یونگول لشدیرمك اوچون اوراداجا یا عاشیقلارین كؤمكلیكلری و یا باشقا باجاریقلی آداملار طرفیندن " قاراوللی" آدی ایله مشهور اولان یونكول، مضحكلی تاماشالار گؤستریلیر".

دوغروداندا ، اساسن، لطیفه لره دایانان قاراوللی لر عومومی تاماشانین تركیبینه محض بو شكیلده داخیل اولور و ائله بو زامان ایجتماعی رغبت قازانماغا باشلایردی . دئملی ، "قاراوللی"تاماشالاری ساتیریك ناغیل، لطیفه له قارشیلیقلی شكیلده تجسسۇم ائدیردی."قاراوللی" تاماشالاریندا كئچل و كوسا دایمی اوبرازلارحئساب اولونوردو. چوخ واخت خالقی تاماشالارا كوسادعوت ائدیر،كئچل ایسه آپارجی و اساس اوبرازلاردان بیری اولوردو.

مؤضوع وائدیاباخیمیندا دا "قاراوللی" تاماشالاری بیر- بیرینه بنزمیردی."قاراوللی"تاماشالاری خالق لطیفه لری ، ساتیریك معشیت ناغیللاری ، كیچیك و مزه‌لی نوْوئللالارین حئسابینا زنگینلشیردی.ایجتیماعی حیاتین موختلیف ساحه لرنینی احاطه ائدن،لاكونیك خاركترلی لطیفه لر"قاراوللی" تاماشالاریندا خوصوصی یئر توتوردو.بو تاماشالاردا ایستفاده ائدیلن لطیفه لرین ، ساتیریك ناغیل لارین و س. یئرلی- یئرینده ، منطقلی، اوبرازلی شكیلده ایشله دیرمئسی ایسه تاماشالاردا اوینویان اكتیورلارین مئهارتی  و تاماشاچی لارین طئلبینده آسیلی ایدی. بونا گؤره ده مئیدان آكتیورلاری شیفاهی خالق ادبییاتینی، خوصوصی له لطیفه لری ، ساتیریك ناغیل لاری ، داها چوخ دا قاراوللی لری یاخشی بیلمه لی ایدیلری.

"قاراوللی" تاماشالاریندا چوخ واخت عاشیق چالار،داستان و غش ناغیل دانیشاردی، سونرا ایسه "كئچل اویونو"،"كوساو كئچل"،"ایسفهان كئچلی"، "كئچل حاققولو:و س.كیمی تاماشالار گؤستریلیردی."قاراوللی" تاماشالاریندا باشلیجا و اساس یئر توتان اوبرازكئچل ایدی. او چوخ بیلن،ساده طبیعتلی،تدبیرلی،اینادكار،فراستلی،قورخماز،ظولمكارلاردان قیصاص آلمایانجا ساكیتلشمئین بیر اوبرازدیر.كئچل بیر اوبراز كیمی حاضیرجاواب و تدبیرلیدیر كی ، بعضن حتتا شیطانین اؤزو بئله اونون عمللریندن باش آچمیر،كئچلین فراستینه حئیرت ائدیر،اوندان حییله، كلك،بیج عمل اؤیرنمك ایستئیر. كئچل"قاراوللی" تاماشالاریندا تز – تز جیلدینی دئییشیر، شرایطه اویغونلاشیر ، چوخ جیلدی مسئله‌‌لری حل ائدیر، آدلی – سانلی، گوجلو، هئیبتلی ، قئزبلی آغالاردان، خانلاردان و بئیلردن اینتیقام آلیر. كئچل حاضیرجاواب دیر.هئچ كس كئچلی آلدادا بیلمیر. او همیشه اطرافینداكی آداملاردان دئرین دوشونجسی، آغلی و آچیق گؤزلولویو ایله فرقیلنیر.كئچل عیبه‌جرلیگی، رذالتی هامیدان تز گؤرور، اونا قارشی موناسیب ، آغلاباتان، منطقلی موباریزه اصولو تاپیر. او گوناه كارلاری كیملییندن آسیلی اولمایاراق لاییقیننجه جزالاندیریر . كئچلین حاققینی تاپدالاماق،منافعیینه و لیاقتینه توخونماق چوخ چئتیندیر. بوتون بو جهتلرینه گؤره كئچل "قاراوللی"تاماشالارینین ان اساس اوبرازی ایدی و خالق كئچل اوبرازینا خوصوصی رغبتله یاناشیر، اونو سئویردی.

كوسا اوبرازی دا "قاراوللی" تاماشالاریندا دایمی اوبرازلاردان بیری كیمی دیققتی جلب ائدیر. او دا كئچل كیمی بیر چوخ "قاراوللی" تاماشالاریندا ایشتراك ائدیر. كوسانین اساس فونوكسیالاریندان بیری ده تاماشادان اوول اولاق اوستونده ایلشیب جاماعاتی "قاراوللی" تاماشالاریندا دعوت ائتمك اولوردو. بوندان باشقا او ، بیر چوخ "قاراوللی" تاماشالاریندا اساس اوبراز كیمی چیخیش ائدیردی. لاكین كوسا كئچلدن فرقلی اولاراق هئچ ده همیشه آغیللی ، گؤزوآچیق، دئرین دوشونجلی كیمی تصویر اولونموردو. بعضن قاراوللیلرده و "قاراوللی" تاماشالاریندا كوسا كوت بئین،كوسئین ، قوجا،تز آلدانان، ساده لوح بیر شخص كیمی تصویر ائدیلیردی. لاكین بونولا بئله ، چوخ واخت او دا كئچل كیمی ، اؤز حاققینی قورویان، آغلی ایله ظالیملردان، آغالاردان قیصاص آلان، موللا و قاضیلری مقامیندا و لاییقینجه جزالاندیران بیر سورتكیمی وئریلیردی.

بؤلوم لر: خالق شیفاهی ادبییاتی،