قالب وبلاگ

اؤزومله فیكیرلشدیم كی، دونـیادا چوخ‎لاری بیر بؤیره‎ك‎له زندگانلـیق ائدیرلر. نییه بو آللاه وئرگی‎سی سرمایه‎دن استفاده ائله‎مه‎ییم.

بؤیره‎ك‎لریمین بیرینی ساتدیم، اول‎كی قـیزیمی ار ائوینه گؤند‎‎ردیم. بیر ایل‎دن سونرا ایكینجی قـیزیم ارلیك اولموشدور. یـئنه هامان پولسوزلوق‌ایدی و هامان چتین‎لیك‎لر. منیم آبیریم واریدی، ائله‎یه بیلمز‌ایدیم ایكینجی قـیزیمی جهیزسیز ار ائوینه گؤنده‎‎رم. یـئنه‎ بیر گون بو نیمكتین اوستونده اوتوردوم و بدنین آیری یـئرلرینه فیكیرلشدیم. البته او یـئرلره‎كی جوت ایدی. مثلن گؤزلریمه. اؤزوم‎له دئدیم ایكی گؤزو نئیله‎ییرم. مگر گؤرمه‎لی شئی‎‌ده وار؟ نییه بو قات- قاریشـیق دونـیانـی ایكی برابر گؤروم و ایكی برابر عذاب چكیم. هر نه روزنامه‎لرین آگهی‎سینه باخدیم، گؤردوم گؤز آلان یوخ‎دور. اؤزوم بیر آگهی وئردیم، روزنامه‎لرین بیرینده چاپ ائله‎دیلر. بیر گون‎دن سونرا مشتری تاپیلدی، ایكینجی قـیزیم‌دا اره گئتدی. ایندی گؤزلریمین بیری شوشه‎دن‎دیر.

بیر ایل‎دن سونرا اوچونجو قـیزیمین نووبتی ایدی. هامی قاپیلار اوزومه باغلی‌ایدی. بیلمیردیم نئیله‎یم. آز قالـیردی باغریم چارتلایا. قولاق‎لاریما فیكیرلشدیم. دئدیم اونلارین بیرین ساتارام، آمما كیم قولاق آلاجاق‌ایدی؟ چوخ مایوس پارك‎دا اوتورموشدوم، روزنامه‎نی ورق‎له‎ییردیم، گؤردوم آگهی صحیفه‎سینده یازیبلار: «بدنین هر یـئرین آلـیریق» ائله‎بیل دونـیانـی منه وئرمیشدیلر. تلفون ووردوم سوروشوردم قولاق‌‎دا آلـیرسیز؟

دئدی‎لر: بیر نفر اونلارین موسسه‎سینه مراجعه ائله‎ییب، دئییر كی، قولاق‎لاری‎نـین بیرین بیر داوادا الدن وئریب، ایندی ائله‎یه‎ بیلمیر قولاق‎سیز كیتاب اوخویا. سوروشدوم قولاغـین نه ربطی‎ وار كیتاب اوخوماغا؟ دئدی‎لر: مشتری قولاغـی بوندان اؤتورو ایسته‎ییر كی عینكی‎نین دسته‎سین قویا اونون اوستونه. تئز معامله باشا چاتدی. اوچونجو قـیزیم ‌دا ار ائوینه گئتدی. ایندی توك‎لریمی اوزاتمیشام، تؤكموشم باشـیمین اویان- بویانـینا، بیلینمیر بیر قولاغـیم یوخدور.

بیر ایل‎دن سونرا دؤردونجو قـیزیمین نؤوبتی‌ایدی. اومیدیمی لاپ الدن وئرمیشیدیم. آمما دوز هامان وقت هامان موسسه‎دن من‎له تماس توتدولار كی، فوری بیر سول اله احتیاج‎لاری وار. سئوینجك اولدوم. داهی سوروشمادیم نه اوچون ایسته‎ییرلر. تئز گئتدیم بیماریستانا، سول الیمی وئردیم، اونون پولو ایله دؤردونجو قـیزی ‎دا اره وئردیم. یاخچی ال ایدی. بیر بارماغـی سینمیشدی، آمما یاخچی ایشله‎ییردی. او تاریخدن بویانا اوزویومو ساغ الیمین بارماغـینا تاخمیشام و ایندی مشتری منیم الیم‎له نه ایش‎لر گؤرور- آللاه بیلیر.

بیر ایل‎دن سونرا گره‌ك آخیر قـیزیمی اره وئره‎یدیم. یـئنه هامان پولسوزلوق ایدی و هامان گرفتارچیلـیق. گلدیم بوردا بو گؤلون قـیراغـیندا اوتوردوم و بدنیمین آیری یـئرلرینه فیكیرلشدیم. آیاغـی ساتماق اولماز ایدی. ماشـین آیناسیز و قاپی‎سیز یولا گئده بیلر، آمما تكرسیز یوخ. بورنومو‌دا اولمازدی ساتام، اوندا قیافه‎می الدن وئره‎ردیم. دیلیمی‎ ده آلمیردیلار، دئییردیلر چوخ ایتی‎دیر. بیر دیله احتیاج‎لاری وار ایدی كی، یالاندان تعریف ائله‎سین.

بیلمیرسیز نه مكافات ایله آخیر قیزیمی اره وئردیم. او گئتدی ائو- ائشیگی‎نین باشـینا.آمما ایندی من اؤزوم ائودن آوارا اولموشام. آروادیم منی ائوه یول وئرمیر و ‎دئییر من داهی نه اومیدله سن ایله یاشایـیم؟!!

عمران صلاحی

بؤلوم لر: حئكایه لر،