قالب وبلاگ

باكو شهرندن، ایران آذربایجانڬ اقصای حدودینه امتداد ایدوب یاییلان طوپراقلرده، آتش پرست دورینڬ زائل اولماز آثاری، بارز، غیرقابل اجتباب بر صورتده موجود بولونمقده‌در. (سوراخانه)ده‌كی (آتشكاه) قدیم ایرانیلر ایچون بو راضینك محرم، و (اوز) بر جولانكا، بر (یورد) تشكیل ایتدیكنی ادعا ایدن یالكز و یكانه بر بر دلیل دكلدر.

بورالرده اقامت ایدن، ایران خانداننه منسوب قوم، آتشه تاپینمش و، آتشه تاپینان اقوام آراسنده، مستثنا بر موقعده احراز ایده بیلمشدر. بر درجه‌ده، بو حال، بو اقلیم‌ده حاكم و مشهور بولونمشدر كه، او زمانڬ آتش پرستلری عندنده، ملت و قومیت مسائلنڬ اڬ زیاده، موضوع بحث ایدیلمه‌سی لازم كلن تقدیرلرده بیله (تبریز) حولیسنده‌كی آذركده‌لر مهم و قطعی بر موقع طوتمقدن گیری قالمامشدر. آذربایجانده ایقاد اولونوب، عنعنه اعتباریله هنوز تماما انطفا قبول ایتمه‌مش اولان (آذركده) اوجاقلری، بو اقوامی، حرارتی بر صهریتله (؟)، اقوام ایرانیه نسلنه مزج ایتدیكی كبی، بو نسلك مهد ظهور و آرامی اولان مركزلره ده آتشین یوللر ایله ربط و وصل ایله‌مش ….. بو كونه پك یاقین بر زمانه قدر، قسما بیله اولسون، یوركلرنده عرقی و نژادی بر تردد، بر شك، بر شبهه اویاندرمامشدی.

مساوات فرقه‌سنڬ فعال و مشهور لیدری اولان ذات عالیڬز، موجودیتی ملحوظ بولونان هر نوع سوء تفاهمی آرادان قالدیرمق اندیشه‌سیله، مقاله‌ڬزڬ نهایتلرنده شو سطر ایده درج ایدییورسكز: “مناسبت كلمشكن سویلیه‌لم: بوتون ایرانلیلر بیلیرلر كه آذربایجان ده‌ینجه، بوتون بحثمز، مدعامز، آنجق روسیه قلمرونده‌كی آذربایجان‌در. ایران آذربایجانن تقدیرات سیاسیه‌سنه قاریشماق، حقمز، حدیمز دكلدر.”

بو خصوصده، ایرانده، شمدی‌یه قدر بر شبهه وارد اولمامش، و ارباب وقوف عندنده، بو بیاناته عینیله مطابق بر قناعت و اعتقاد كامل عالما موجود بولونمشدر.

“آذربایجان بر ملت ایسه، او ملتڬ، متمدن بر ملته یاقیشاجق درجه‌ده مطبوعاته، معاصر ادبیاته، معاصر مكتبلره و آز چوق تربیه سیاسیه‌یه مالك اولان قسمی همان ارس شمالنده ساكن‌در، بونلر اوزلرینك بر ملت اولدوقلرینی دها روس استبدادی آلتنده ازیلیركن درك ایتدیلر.” دیه، ایران آذربایجانی حقنده اتهام آمیز، ازیجی، … اولمق ایستین بر لهجه قوللانمق احتیاجنی، بیلمه‌یز نیچون حس ایتمیشسكز؟ … بو سوزلر، بر قاج سنه اول (فیوضات) ایله (حقایق) غزته‌لری آراسنده آچیلوب، كندی املا انشا غلطلرینه قارشی بیله محافظه‌دن عاجز اولان (حقایق) مدافعنڬ انهزامیله نهایتله‌نن بر مناقشه قلمیه‌ینی اخطار ایدیور.

بو مسئله، او زمان، هر دورلو اهمیتدن عاری كبی تلقی ایدلمش و وقایع یومیه عادیه‌دن بری كبی، اولمش بیتمشدی. او ماضی‌یی احیا ایتمك فكرنده، طبیعی دكلز.

صلاحیت دار مقاله‌كزڬ، بوتون مندرجاتنه مذكور مقاله‌یی ختم ایدن ایكی سوزڬ -هر تجاوز و تعرضی اوڬجه‌دن محكوم ایله‌ین- قدسیتی آلتنده یر ویرمشدیكز. “ایكی قارداش ملت آراسنده‌كی اخوت اسلامیه نامنه” سرد اولونان مطالعاتی، یكیدن بر مناقشه طرزینه ارجاع ایتمك آرزوسی- تكرار ایدیورز- بزده یوقدر. حتی، بو اندیشه‌دن، بالكلیه عاری بولونسه ایدی، وجدانمز، استطراد قبیلیندن اولان، بو مجمل مطالعاتینده بزه منع ایلردی.

بر طاقم وقایع واردر كه تكرر ایتدیكجه خاطراتی اویاندیررلر. اویانانلری دائما رد ایتمك، سكوته مجبور ایله‌مك، بر دها اویاتماقلرینه باعث اولابیله‌جكی ایله ایشمز یوق. فقط، ممكن اولان كوچك كوچك استفاده فرصتلرینی ده هبا و هدر ایده‌بیله‌جكی اوچون شایان تاسف بر حركتدر.

تخطر ایتمكده اولدیغمز مناقشه اثناسنده ایدی كه ترقیاتنی قابل لمس، منتظم اصوللر دائره‌سنده، تشهیر ایده‌بیلن بر اسلام مدنیتندن بحث ایدركن، فیوضاتڬ استشهاد ایله دیكی ایستاتیسیق رقملری مقابلینده (حقایق)‌ڬ، بر درلو تثبیت و تقریر ایده‌مه‌دیكی دلائل محو اولوب میداندن چكلمشلردی.

بو ایكی غزته بیننده‌كی دوئللو، حقیتنده ایكی جریانك تلاقیكاهنده حصوله كلن بر غلیان قدر شموللی و معنیدار ایدی. حقایق، بویوك تضییقلر آلتندن، فیشقیران جریانلر، قارشی او نحیف، باخصوص تجهیزاتی ناقص صحائفیله مقاومت كوستره‌مزدی ….

دها مكمل شرائط ایله حاضرلانمش اولسه ایدی بیله ینه حقایقڬ، فیوضاته، استقساضه (؟) جریانلرینه، غلبه چالابیله‌جكی شبه‌لی ایدی. متعاقبا حقایق انهزامنی بر چوق وقایع دها، توسیع ایده‌رك مسئله‌یی بیله آرادان قالدیروب، معین و فائق بیر جریانه، سربست یوللر آچمشدی.

اقتباس ایتدیكمز پارچه‌یی ذات عالیكز شو صورتله ختم ایدیورسكز: “معارف و ادبیاتجه (روسیه آذربایجانلیلری) طبق ایران آذربایجانی كبی فارسلاشمش ایكن (؟) روس پولیتقیه‌سنڬ تضییقی آلتنده اویاندیلار.”

هیهات! (آراس) طالغه‌لرینك، عصرلردن بری، كمیروب طوردیغی ایكی قارداش آذربایجانی، -تاریخی یازان اللر- او درجه ئویرب چه‌ویرمش، و بر شكلدن دیگر بر شكله افراع ایله نهایت ینه موقت بر اویله شكل دیگرله میدانه آتمشدر كه، اگر چكدكلری فلاكت، بوكونه قدر تحمل ایتدیكلری مصائب، بوتون موجود آغیرلغیله، اوموزلری اوزرینه چكمه‌مش بولونسه ایدی، یكدیكرلرینی طانیماغا، بری برلریله آكلاشمغه مشترك بر زمینه، متحد بر لسان بیله بولمقدن عاجز قالاجقلردی.

بری برندن آیری بویومش ایكی قارداش آراسنده بوگون، یالكز بر رابطه، یالكز بر علاقه موجود: همدردلك، نصیبداشلق!

جریانلر، پروغراملر، طبیعی ایمش كبی پرشدت انهماكلر، بو ایكی قارداشی، حیات چارپشمالرنده، هیجانلی ماجرالره سوق ایدركن، ظن ایدییورز كه بوكون، اڬ زیاده مناسب حركت صبر و سكوت و تحملدن بشقه بر شی اولاماز.

كوزله‌یه‌لم …. زمان كلسین و بر آز دها تجربه‌دیده، بر پارچه دها متكامل ایكی قدیم قارداش- حیاتك غامض مسائلنی بر درلو حل ایله دكل- نظریاتی حیاته تطبیق ایله اوغراشمش، بوروشمش آلنلرینی بری برینه یاقلاشدیرارق دها واضح، دها صمیمی لسانلرله ماضیدن و استقبالدن بحثه كیریشسونلر …