قالب وبلاگ

باكی جیواریندا اولان بالاخانی پئترول اوجاقلاری محللینده بیر فابریكانین ایشچیلرینه مخصوص ائولردن بیرینده چوخ بسیط بیر اوتاقدا قارشیمیزا ضعیف، اوزگون و اورتادان بیر آز اوزون بویلو بیریسی چیخدی. بسیط قییافه‌لی اولان بو ذاتین چیچك پوزوغو ایله چوپورلانمیش اوزونه دقت ائتدیم، جدی بیر تؤورله گولومسونوردو. بیزی طبیعی و سربست بیر ادا ایله قارشیلادی. گورجو آكسئنتی قوووتله حیسس اولونان بیر روسجا دانیشیردی. آدی خوش-بئشدن سونرا سؤز سییاسی و سوسیال مسئله‌‌لره كئچدی. 

شوبهه‌سیز، موساهیبه او گونلرین ان آكتوال بیر مسئله‌‌سی اوزرینه گله‌جكدی. او زامانكی سوسیالیستلر، عمومیتله ماركسیستلر، بولشئویكلرده خصوصن ایشچی سینفینی و خصوصیله پرولئتاریاتی ایدئالیزه ائتمك بیر مودا ایدی. كوبا پرولئتاریات سینفی‌نین دیگر صینیفلره نیسبتله تاریخن اوستون بیر صینیف اولماسی اوزرینده دوردو، دونیاداكی عدالتسیزلیكلرین اصیل سببی مولكیت اساسینا دایانان كاپیتالیست سیستمینده‌دیر، دئدی. دونیانی حقیقتن معصوم گؤرمك ایسته‌ین حقیقی هورریت و عدالت طرفدارلاری اونا گؤره بو سیستمی كؤكوندن ییخمالیدیرلار. میللتلری و چالیشان خالقلاری ظلم و ایستیبدادی آلتیندا توتان چارلیق بو سیستمه اساسلانمیشدیر. چارلیغین كؤكونو تامامیله كسمك اوچون بو مولكیت سیستمی ییخیلمالیدیر. بئله درین بیر اینقیلابا آنجاق مولكیتله باغلی اولمایان پرولئتاریات سینفی حاضر اولار. چونكی او هئچ بیر شئیه مالیك دئییلدیر، اونون مالی آنجاق ایكی الی ایله بیر باشیدیر. اینقیلاب مؤوضوسوندا یالنیز پرولئتاریاتین صمیمیتینه اینانماق مومكوندور. ماركسیستلرین مشهور سئچیلمیش صینیف نظریه‌‌سینه اویدورولان بو فورمولو ستالین بیر ده پراكتیكادا راستلادیغی باریز بیر مثاللا تصویر ائتدی. من، دئدی، بیر قروپ ایشچیلرله كونسپیراسییا شرایطینده آرادا-سیرادا تاپیشیر، تشكیلات و تبلیغات ایشلریله مشغول اولوردوم.

--------------------------

* معلوم اولدوغو عذره “كوبا” ایوسیف ویسساریونوویچ جوقاشویلی‌نین ایلك ایستیفاده ائتدیگی اویدورما آددیر. قافقازدا ایكن بو آدی گؤتورموشدو؛ ستالین آدینی ایسه سونرا، روسییا داخیلینده چالیشماغا باشلاركن قبول ائتمیشدی. یئنه معلوم اولدوغو عذره “كوبا” بیر گوجلو رومانیندان آلینمیش چارلیغا قارشی موجادیله ائدن بیر چئتئ قهرمانی‌نین آدیدیر. 

بو قروپا گئدیب-گلنلرین بیری حاقیندا بیر گون یولداشلارا شوبهه‌لندیگیمی سؤیله‌دیم، بو آدام منیم هئچ خوشوما گئتمیر، دئدیم. اعتبار ائده بیلمیرم. سونرا بیر نئچه دفعه‌‌ قارشیلاشساق دا، او آدامی آرامیزدا گؤرمه‌دیم. بیر گون ماراقلاندیم، نه اولدو بو یولداش، دئدیم، نییه گلمیر، دئیه سوروشدوم. ایشچیلر:

- كوبا یولداش، سیز بو آداما اعتبار یوخدور، دئدینیز ها!.. بیز ده اونو درحال تمیزلییه وئردیك!.. دئدیلر. 

ایلك تانیش اولدوغو بیزلره “پرولئتاریات صداقتی” حاقیندا آنلاتدیغی بو احوالاتدان چیخاریلاجاق نتیجه آیدیندیر. 

بؤلوم لر: محمدامین رسول زاده،