قالب وبلاگ

كئچل پول ایسته یئنده ، دارغا بیر شاپالاق دا اونون اوزونه ووروب یولا دوشدو. كئچل هئچ بیر سؤز دئمه ییب ، خلوتجه اونون دالینجا یولا دوزلدی.دارغا دوز ائوینه گئدی. كئچل ده قاپیدا دوروب اونو پوسدو. دارغا تویوقلاری  آروادینا وئردی .

آروادی دئدی:

-          آ كیشی ، بونلار نه یاخشی كؤك تویوقدو، نئچییه آلدین؟

دارغادئدی:

-     بیر شاپالاغا. بونلاری بیشیر، قوناقلاریم باغا گئلجك. من گئدیرم.كئچل نؤكریمی گؤندره جئیم، نه ایستسه وئر، قوناقلار اوچون گئتیر سین.دارغا بونو دئییب گئتدی.

كئچل  دارغانین دئدیكلرینی ائشیدیردی. گؤزلدی دارغا گئتدی. بیر آز كئچدی، كئچل دارغانین ائوینه گیریب دئدی:

-          خانیم ، منی آغا گؤندرییب.آغام ایكی خالی ، ایكی گبه، ایكی ده خالچا ایسته ییر باغا سالماغا،قوناقلار گئله جك.

خانیم كئچلین دئدیكلرینی وئریب یولا سالدی.كئچل گبه لری گؤتوروب ، اؤز ائولرینه گئتدی.

آناسی دئدی :

-          آوغلوم، بونلاری نه ایله آلدین؟

-          تویوقلارین باهاسینا.

كئچل یئنه دارغانین ائوینهگئدیب، گؤزله دی ، تویوقلار بیشدی.

خانیم دئدی:

-          كئچل ، ایندی نئیه گلیبسن؟

كئچل دئدی :

-          آغام دئدی تویوقلاری وئرسین.

خانیم تویوقلاری بیر قابا قویوب،اوستونه ده اؤرتوك چئكیب ، كئچله وئردی. كوچل تویوقلاریگؤتوروب، ائولرینه گلدی.

آناسی دئدی:

-          آی اوغلول، بونلاری نه ایله آلدین؟

-          آی آنا ، بونلاری دا تویوقلارین باهاسینا. گل اوتور یئیئك.

اوتوردولار، آنا- بالا تویوقلاری شیرین یئدلر. او طرفدن دارغا كئچل نؤكرینی گؤندردی كی گئت خالی – گبه نی گئتیر، باغی دؤشه‌یك، قوناقلارگله جك.

كئچل نؤكر  گلیب دئدی:

-          خانیم، منی آغا گؤندرریب ، خالیلار،گبه لری ، تویوقلاری وئرآپاریم،قوناقلار گئلیر.

خانیم دئدی:

-          آی كئچل ، منی اله سالیبسان، ندی؟ بیرآز بوندان قاباق گلیب آپارمادین می؟

كوچل دئدی:

-          آیخانیم ، نه دئییرسن؟

خانیم باشینی قالدیریب گؤردو كی ، بو لاپ نؤخودو كئچل دی، دئدی:

- گئت ، آغانا سؤیله كی بیر كئچل گلدی سنین آدنی وئریب خالیلاری،گبه لری، تویوقلاری آپاردی.

نؤكرآغاسینین یانینا گلیب دئدی:

-          خانیم دئییر  بایاق بیر كئچل گلدی گبه لری ، خالیلاری، تویوقلاری آپاردی.

دارغا بیلدی كی بو كئچل تویوق یییه‌سی كئچل دی. اونون دالینا دوشدو سوراق ائله‌یه- ائله‌یه

گلیب ائولرینی تاپدی. كئچل اوزاقدان دارغانی گؤروب اؤلن باجیسینین پالتارینی گئیندی، حیئطه چیخدی، باشلادی دؤرد بیر یانی سوپورمئیه. دارغا گؤردو بیر قیز حیئط سوپورور، دئدی:

-          آی قیز كیمسن؟

كئچل دیدی:

-          قارینین قیزییام.

دارغا دئدی:

-          منه كلرسن می؟

كئچل دئدی:

-          گله‌رم اگر آلسان.

دارغا قیز پالتاری گئیمیش كئچلی گؤتورروب ائوینه آپاردی. آخشام اولدو،یئدیلر،ایچدیلر،صؤحبته باشلادیلار. كئچل دارغانین ائوینه كؤز گزدیریب گؤردو، ائوده منگنه وار ، دئدی:

-          دارغا او نئدی؟

دارغا دئدی:

-          بو منگنه دی . من شهرده اوغرو توتاندا بونا سالیب تنبیه ائله ییرم.

كئچل قاخدی، منگنه‌یه گیریب دئدی:

-          بور گؤروم، نه ایلییر؟

دارغا منگنه نی بیر آز بوردو.

كئچل دئدی:

-          آی قابیرغالاریم قیریلدی، آچ.

دارغا تز منگنه نی آچدی ، كئچل چیخیب دئدی:

-          ایندی دهسن گیر، من بوروم.

دارغا دئدی:

-          گؤزله ها ، برك بورما ، قابیرغالاریمی قیرارسان.

كوچل دئدی:

-          قورخما، برك بورمارام.

دارغا منگنه یه گیریب .كئچل منگنه نی ائله بوردو كی ، دارغانین قابیرغالاری بیر – بیرینه كئچدی.

دارغادئدی:

-          آی قیز ، اؤلدوم، آچ !

كئچل دئدی:

-          نه قیز، تویوقلاری زورلا آلا بیلردینمی؟ منه شاپالاق ووراردینمی؟ دارغا باخیب گؤردو قیز نه گزیر، بو همین كئچلدی، دئدی:

-          - آی كئچل ، منی اؤلدورمه، آتام سنه قوربان، هر نه ایستییسن وئریم.

كئچل قولاق آسمادی، منگنه نی داها برك بوردو. دارغانین سسی كئسلدی. دارغانین كیم طرفیندن منگنه یه سالیندیغیندان،هئچ كسین خبری اولمادی.

بؤلوم لر: خالق شیفاهی ادبییاتی،