قالب وبلاگ

میللی آذربایجان حركاتی‌نین هر دورلو سییاسی، سوسیال، اقتصادی و كولتورل (مدنی) حركاتلاری اوزرینده موسسیر اولان مركزی موسسیسه‌لر اكثریتله بورادا بولونوردو. باكی سنایئسینده، پئترول اوجاقلاریندا چالیشان ایشچیلرین بؤیوك بیر قیسمی ایله اورتا مكتبلرده تحصیل ائدن گنجلیگین موهوم قیسمینی آذربایجان توركلری تشكیل ائدیردیلر. بو سببله بورادا فعالیتده بولونان عومومی ایختیلال و موخالیفت جریانلاری‌نین یانیندا موستقیلن حركاتدا بولونان یئرلی و میللی قروپلارلا تشكیلاتلار دا واردی. او جومله‌‌دن طرفیمدن تشكیل اولونموش، عضولری موخلیف روس لیسئلرینده و دیگر اورتا مكتبلرده اوخویان آذربایجان تورك طلبه‌‌لریندن عبارت گیزلی بیر درنك واردی. بو درنك منسوبلاری‌نین میللی حیسسلرینی تهریك ائتمك، روس مكتبلرینده اوخودولمایان توركجه‌نی اؤز-اؤزونه ایلرلتمك، یئرلی ادیبلرین اثرلرینی اوخوماق، چارلیق علئیهینه یازیلمیش ایختیلال شئرلرینی ازبرله‌مك و آرادا-سیرادا متبه اصولو ایله باسیلمیش بَیاننامه‌لر داغیتماق، ایشچیلر آراسینا گئده‌رك هورریت و اینقیلاب فیكیرلرینی بونلارین آراسیندا سیستملی صورتده یایماق كیمی فعالیتلر ده اولوردو. درنه‌یین متبه اصولو ایله اینتیشار ائدن بیر ده “حوممت” آدینی داشییان بیر درگیسی (ژورنالی) واردی. 

جمعیت و خصوصیله گنجلیك ایچینده‌كی هر جور قایناشما و بیرلشمه‌لری اؤز نفوذلاری آلتینا آلماق اوچون رقابت ائدن بولشئویكلرله مئنشئویكلرین فورصت قاچیرمایان پروپاقاندیستلری، طبیعی، بیزیم درنه‌یه ده سوخولور، هر نئجه اولسا دا بیزلری اؤز حسابلارینا قازانماق ایسته‌ییردیلر. بولشئویك فراكسییاسی تیفلیسه نیسبتن باكیدا داها قوووتلی ایدی. 

گرك بحث ائتدیگیم بو درنه‌ییمیزه سوخولان پروپاقاندیستلردن، گركسه باشقا شرطلر داخیلینده قارشیلاشدیغیم چارلیق علئیه‌داری بعضی شخصلردن باكیدا بولشئویك فراكسییاسینی ایداره ائدن كوبا آدیندا ائنئرژیلی بیریسی‌نین اولدوغونو ائشیتمیشدیم. 


بؤلوم لر: محمدامین رسول زاده،