قالب وبلاگ

معلوم اولدوغو عذره بو ایكی فراكسییانی بیر-بیرینه توققوشدوران آنا مؤوضو مشهور تاكتیكا مسئله‌‌سی ایدی. مئنشئویكلر رئژیمه قارشی سییاسی یوللا موباریزه ائده‌رك چارلیغی دئویرمك، یئرینه جومهوریت ایداره‌سی قویماغا طرفدار اولوب، سوسیالیزم پرینسیپلری‌نین سوسیال قورولوشدا موسسیر اولماسینی طلب ائتدیكلری حالدا، مؤوجود كاپیتالیزم شرطلری ایچینده سوسیال بونؤوره‌نین جبر و اینقیلاب یولو ایله دئییل، تدریجی ائوولیوسییا اصوللاری ایله گلیشدیریلمه‌سینی (اینكیشافینی) توصیه‌‌ ائدیردیلر؛ بو مقصدله اونلار بورژوا سینفی‌نین چارلیق رئژیمی علئیهینده اولان لیبئرال و رادیكال زومره‌لری ایله سییاسی كوالیسییا یاپماغی لوزوملو گؤروردولر. بیر اینقیلاب پارتییاسی اولاراق كونسپیراسییا و گیزلی فعالیتده اولماسینا باخمایاراق، بو فراكسییا عضولری شرطلر الوئریشلی اولونجا قانونی ایمكانلاردان دا ایستیفاده ائتمیی لوزوملو بولوردولار: بو مقصدله اونلار ایشچی (فحله) سیندیكالارینا سوخولاراق بونلاری ایشچی سینفی‌نین حقیقی منفتلرینی مدافعه‌‌یه ایلك سیرادا اؤنم وئرمه‌یه تشویق ائدیردیلر. بیر ایختیلال پارتییاسی اولاراق بولوندوغو كونسپیراسییا شرطلری داخیلینده بئله مئنشئویكلر دئموكراتیك اصوللارا صداقتی زروری گؤرور، تشكیلاتا داخیل كومیته‌لرین آشاغیدان یوخارییا گلن دئموكراتیك بیر سئچیم ایئرارخییاسینا قطعی بیر اؤنم وئریردیلر. 

حال‌بوكی بولشئویكلر بونا تامامیله ضد اولان بیر تاكتیكا یئریدیردیلر؛ بیر كره بونلار بورژوا پارتییالاری ایله هر جور كوالیسییانین علئیهینده ایدیلر؛ سییاسی بیر سیستم اولاراق،چارلیق رئژیمی ایله بیرلیكده اونلار اقتصادی بیر سیستم اولاراق كاپیتالیزمی ده دئویرمك عزمینده ایدیلر. ایشچی سیندیكالارینا،ایشچیلرین ائكونومیك منفتلرینی مدافعه‌‌دن ضیادا بونلاری رئژیمه قارشی دایما موخالیف و موجادیله ائدن بیر ایختیلال اورقانی كیمی باخیردیلار. پارتییانین اؤز ایچینده‌كی تشكیلات سیستمینه گلینجه، آشاغیدان یوخارییا گئدن بیر دئموكراتیك سیستمی دئییل، یوخاریدان آشاغییا گلن بیر ایختیلال سیستمینی مدافعه‌‌ ائدیردیلر. “اینقیلابچی آزلیق” حاكمیتی و مركزیت بولشئویك پارتییاسی‌نین دیَیشمز شواری ایدی. 

بؤلوم لر: محمدامین رسول زاده،