قالب وبلاگ

خاریجی  اؤلكلرله  و  اؤلكه  داخیلینده  شهرلراراسی  تیجارت  علاقه‌‌لری اوْرتا عصر آذربایجان شهرلری‌نین اینكیشافینا، اوْنلارین چوْخلو اهالیسی اوْلان ایری شهرلره چئوریلمه‌سینه شرایط یارادیردی. دوْققوز عصردن باشلایاراق بؤیوك بازار مئیدانلاری اوْلان یئنی تیپلی ایری شهرلر فوْرمالاشیردی. برده، باكی، گنجه، شاماخی، بئیلقان، ناخچیوان، اردبیل، تبریز، ماراغا، اۇرمییا و دیگر شهرلر اؤلكه‌نین تسرروفات حیاتیندا بؤیوك اهمیتی اوْلان تیجارت و صنعتكارلیق مركزلری كیمی مشهور ایدیلر.

ایری شهرلرین اهالیسی‌نین اساسینی صنعتكارلار تشكیل ائدیردی. مۆختلیف صنعتكارلیق ساحه‌لری‌نین شهرلرده مركزلشمه‌سی و ایستئهسال ائدیلن ممولاتین تیجارتی اؤلكه‌نین اقتصادیاتی‌نین اینكیشافی اۆچون خۆصوصی اهمیته مالیك ایدی. فئوْدال حاكمیتدن آسیلی اوْلان صنعتكارلار شخصی و مۆلكی تهلوكه‌‌سیزلیكلرینی قوْروماق اۆچون همكار (عینی پئشه صاحبی) آدی ایله مشهور تشكیلاتلاردا جمعلشیردیلر. اوْنلارا باش اۇستا (اۇستاد) رهبرلیك ائدیردی. همكارلار اوْرتا عصر شهرلری‌نین سییاسی و اقتصادی حیاتیندا چوْخ بؤیوك روْل اوْیناماقلا برابر هم ده پئشه‌یه تام معناسیندا یییه‌لنمكده، پئشه‌نین سیرلری‌نین مۆحافیظه‌‌ ائدیلیب ساخلانیلماسیندا و نسیلدن-نسله كئچیریلمه‌سینده چوْخ بؤیوك اهمیته مالیك ایدی.

اساساً قالادیوارلاری و شهراطرافیندا یئرلشن صنعتكارلیق ائمالاتخانالاریندا  مئتال، گیل، شۆشه،  یۇن و س.  ماتئریاللاردان  مۆختلیف صنعتكارلیق محصولو ایستئهسال ائدیلیردی. صنعتكارلیغین مۆختلیف ساحه‌لری‌نین اینكیشافی اۆچون مؤوجود خاممالین بؤیوك اهمیتی وار ایدی. تیجارت یوْللاری اۆزرینده یئرلشن اوْرتا عصر آذربایجان شهرلری نادیر خاممالین آلینماسی و ایستئهسال ائدیلن محصولون تیجارتی اۆچون چوْخ الوئریشلی شرایطه مالیك ایدیلر. توْخوجولوق بۇ دؤورون ان اینكیشاف ائتمیش صنعت ساحه‌‌لریندن  ایدی.  اوْن  عصرین  عرب  جوْغرافییاشوناسلاریندان ال-مۆقدسی و مسعودی‌نین وئردیگی معلوماتا گؤره، آذربایجان صنعتكارلاری ساتیش اۆچون یۇن و پامبیقدان چوْخلو پارچا و گئییم حاضیرلاییردیلار. گنجه‌ده ایستئهسال ائدیلن  یۇن پارچالار  خۆصوصیله  مشهور ایدی. شاماخی، برده، شكی، گنجه ایپك ایستئهسالی مركزلری كیمی شؤهرت قازانمیشدی. تبریز خالچالاری‌نین سوْراغی چوْخ اۇزاق اؤلكلردن گلیردی.

اوْرتا عصر دئكوْراتیو صنعت نۆمونه‌لری‌نین ان چوْخ یاییلمیش و اینكیشاف ائتمیش ساحه‌‌لریندن بیرینی دۇلوسچولوق صنعتی تشكیل ائدیردی. میشتله سێخ باغلی اوْلان بۇ صنعت نؤوع دئمك اوْلار كی، آذربایجانین بۆتون شهر و كندلرینده ایستئهسای ائدیلیردی. سككیز- اوْن عصر دۇلوسچولوق صنعتی اساساً بیر ایستیقامتده اینكیشاف ائتمیشدیر. بۇ دا میشت ممولاتی ایستئهسالی ایله علاقه دار اوْلموشدور. میشت و تسرروفاتلا سێخ باغلی اوْلان شیرسیز ساخسی ممولاتی ایله یاناشی یۆكسك بدیی كئیفیتلی، مۆختلیف دئكوْراتیو اۆسلوبلو و مۆرككب دئكوْرلو شیرلی ساخسی ممولاتی پارالئل اوْلاراق اینكیشاف ائتمیشدیر.

بؤلوم لر: آزربایجان ، دیل و تاریخی،